नकोर देशको नक्शा छिमेकी आइ च्यातेर जान्छ ! -लोकेश जलन

मेरो खुट्टाको रहर पूरा गर्ने जो जुत्ता थियो ।
त्यहीँ जुत्ता हो काल बनेको बुवाको लागि !

सबै रङ्ग सबैका लागि रङ्गिन कहाँ हुन्छन् ।
रङ्ग बिहिन भैदिन्छ रातो विधुवाको लागि !

यो आँखामा आँसु देखेर कठै भन्छौ तिमी ,
अरे यार नदि केही होइन बालुवाको लागि !

यसरी पनि त सकिन्छ नि मान्छे रिझ्याउन ।
ऊ पुगेको छ सगुन बोकेर सरुवाको लागि !

******************************

मेलो नसकिदै मेलामा परेको हो मुसलधारे पानी,
बाआमा भिजेर फर्किए बच्चा ओभानो फर्कियो ।

आमाको यै जिज्ञासा घरिघरि दोहोरीन्छ ममाथि ।
तँ फर्कन्नस छोरो तँसगै गएको फलानो फर्कियो !

दिनमा यौटा रातमा अर्को राज गर्छ यो आङमा ।
चिसोको पालो थ्यो चिसो आयो न्यानो फर्कियो !

आफ्नो थियो कोही बेला अघि भेटिएको मान्छे ।
रत छातीबाट गएको छातीमै भक्कानो फर्कियो !

************************************

क्वै मान्छेको क्वै भुमिको बेपार गर्छन् यो देशमा ,
हामी मात्रै किन इमानदार भएको सोझा भएको ?

चुलो देखि पिढी पुग्न लौरोकै सहायता लिनुपर्छ।
छ न त ऊ,छ नि छोरो बलिस्ठ हातगोडा भएको !

न ऊ मेरो काम लाग्यो,न त म उसको काम लागे ,
अर्कैले लाभ उठायो ऊ गाग्री म लोहोठा भएको !

************************************

गधा भन्नू भयो अल्लि अग्लो भएको छु र मालिक ?
म आजसम्म हजुरको आँखालाई कमिलो लाग्थ्यो ।

आगामी रात ऊ बिना आसामले उज्यालो पार्नु छ ।
जो बिना तकिया होचो बिस्तरा असजिलो लाग्थ्यो !

सुकिलो हुन पाएको छैन आफ्नै काखमा यो जीउ ,
आमाको काखमा न धुलो लाग्थ्यो न हिलो लाग्थ्यो !

*************************************

जुन मान्छे म सयौं बर्ष बाँचोस् भनेर प्रर्थाना गर्छु ।
त्यहीँ मान्छे आएर यो घाँटीमा डोरी नापेर जान्छ !

ए काडा तेरो जस्तो सजिलो छैन फूलको दैनिकी ।
यौटा आएर हेेरेर जान्छ अर्को आएर चुडेर जान्छ !

बाढी आउँछ भुकम्प आउँछ लिएर जान्छ घरखेत ।
सरकार आउँछ एक पोको चाउचाउ दिएर जान्छ !