काठमाडौं, भदौ १४ – रसुवास्थित भोटेकोशी नदीमा पानीको बहाव बढ्दै गएपछि स्थानीय प्रशासनले नदी आसपासका क्षेत्रका बासिन्दालाई सतर्क रहन आग्रह गरेको छ।
आज बिहान आएको बाढीपछि भोटेकोशीमा बहाव थप बढेको जनाइएको छ। यसको प्रभाव रसुवासहित नुवाकोट, धादिङ, चितवनलगायतका नदी आसपासका प्रभावित क्षेत्रमा पर्न सक्ने भन्दै प्रशासनले सावधानी अपनाउन अनुरोध गरेको हो।
बिहान ७ः२० बजेको अवस्थासम्म नदीको बहाव बढिरहेको भन्दै खोज तथा उद्धारमा खटिएका सुरक्षाकर्मी, राहतकर्मी, तटीय क्षेत्रमा रहेका नागरिक तथा अन्य सरोकारवालालाई समेत सतर्क रहन भनिएको छ।
यता, धादिङका पत्रकार शंकर श्रेष्ठका अनुसार त्रिशूली नदीमा पानीको बहाव करिब ३ मिटरसम्म बढेको छ। नदीको जलस्तर बढिरहेकाले जोखिमयुक्त स्थानमा रहेका नागरिकलाई सुरक्षित रहन आग्रह गरिएको छ।
