काठमाडौं, भदौ १२ – प्रधानमन्त्री दैवी प्रकोप उद्धार कोषमा छोटो समयमै ठूलो मात्रामा सहयोग रकम जम्मा भएको छ। पछिल्लो ३६ घण्टामा मात्रै कोषमा १ अर्ब ९१ करोड ८६ लाख ५० हजार ९११ रुपैयाँ सहयोग प्राप्त भएको हो।
अर्थ मन्त्रालयका अनुसार बुधबार मध्याह्नदेखि बिहीबार राति १२ बजेसम्म विभिन्न १० वाणिज्य बैंकमा रहेका कोषका खातामा उक्त रकम जम्मा भएको हो। बाढी तथा विपद्बाट प्रभावित नागरिकको उद्धार, राहत तथा पुनःस्थापनामा सहयोग पुर्याउने उद्देश्यले व्यक्ति तथा संस्थाले कोषमा रकम उपलब्ध गराएका छन्।
भोटेकोशी नदीमा आएको विनाशकारी बाढीबाट ठूलो जनधनको क्षति भएपछि सरकारले प्रभावित क्षेत्रलाई सङ्कटग्रस्त क्षेत्र घोषणा गरेको थियो। त्यसपछि कोषमा स्वेच्छिक सहयोग आउने क्रम तीव्र भएको हो।
राहत कोषमा सहयोग रकम सङ्कलन तथा समन्वयका लागि सरकारले अर्थ मन्त्रालयलाई फोकल मन्त्रालय तोकेको छ। व्यक्तिगत रूपमा नगद सहयोग गर्न चाहने दाताले अर्थ मन्त्रालयमै पुगेर रकम प्रदान गर्न सक्ने व्यवस्था गरिएको छ।
नयाँ रकम थपिएसँगै कोषमा बचत रहेको कुल रकम ४ अर्ब ९ करोड ११ लाख ६० हजार रुपैयाँ पुगेको छ। यसअघि कोषमा २ अर्ब १७ करोड २५ लाख ९ हजार ७५९ रुपैयाँ रहेको थियो।
यसअघि बिहीबार ६ घण्टामै निजी क्षेत्रका दाताबाट मन्त्रालयमार्फत २७ करोड ३३ लाख रुपैयाँ सहयोग प्राप्त भएको थियो। तर मित्रराष्ट्रहरूले घोषणा गरेका सहयोग रकम भने हालसम्मको उक्त विवरणमा समावेश गरिएको छैन।
