काठमाडौं, भदौ १८ – भोटेकोशीमा आएको बाढीका कारण त्रिशूली–३ ‘ए’ जलविद्युत् आयोजनाको केबल डक्ट सुरुङको प्रवेश क्षेत्रमा थुप्रिएको लेदो र भग्नावशेष हटाउने काम तीव्र गतिमा भइरहेको छ।
१३ भदौदेखि दुईवटा एक्स्काभेटर परिचालन गरेर सुरुङको पोर्टल क्षेत्रमा सफाइ थालिएको हो। पाँच दिनमै करिब २० हजार घनमिटर लेदो, बालुवा, ढुंगा, कंक्रिटका टुक्रा तथा अन्य भग्नावशेष हटाइएको इन्जिनियर उदयराज न्यौपानेले बताए। ठूला आकारका दुई दर्जनभन्दा बढी बोल्डरसमेत नियन्त्रित विस्फोटमार्फत हटाइएको छ।
सफाइका क्रममा आवश्यक ठाउँमा ब्रेकर र नियन्त्रित विस्फोटक प्रयोग गरिएको छ। चौबीसै घण्टा काम भइरहेको र हाल सुरुङको प्रवेश क्षेत्रतर्फ करिब ५० मिटर भाग सफा भइसकेको न्यौपानेले जानकारी दिए।
प्रारम्भिक निरीक्षणका क्रममा सुरुङभित्र पानी थुनिएको अवस्था नदेखिएको बताइएको छ। सुरुङबाट प्रतिसेकेन्ड करिब दुई लिटर पानी बाहिर निस्किरहेको छ भने पानीको दबाबसमेत नरहेको इन्जिनियर न्यौपानेको भनाइ छ। सुरुङको मुखमा भने लेदो, काठ, गेटको स्ल्याब र ठूला ढुंगाले अवरोध सिर्जना गरेका छन्।
आयोजनाको केबल डक्ट सुरुङ १६० मिटर लामो छ। करिब ६० मिटरको दूरीमा घुम्ती रहेको सुरुङ पावरहाउसतर्फ उकालो रहेकाले भित्री संरचना सुरक्षित रहेको प्रारम्भिक अनुमान गरिएको छ। तर सुरुङभित्रको अवस्था पूर्ण रूपमा यकिन गर्न अझै सफाइको काम अघि बढाउनुपर्नेछ।
घटनास्थलसम्म सडकमार्गबाट पुग्न नसकिने भएकाले आवश्यक मेसिन तथा उपकरण हेलिकप्टरबाट पुर्याउनुपर्ने बाध्यता छ। उपकरण मर्मतका सामग्री ढुवानीमा केही कठिनाइ भए पनि सफाइ तथा उद्धारको काम रोकिएको छैन।
