झापा, भदौ ९ – झापाको दमकमा १३ वर्षीया बालिकालाई झुक्याएर होटलमा पुर्याई यौन शोषणमा लगाएको आरोपमा प्रहरीले दुई जनालाई पक्राउ गरेको छ।
प्रहरीका अनुसार पक्राउ पर्नेमा मोरङको केराबारी गाउँपालिका–९ देवीझोडा घर भई दमक क्षेत्रमा बस्दै आएकी जुनु भन्ने पार्वती ऋषिका र दमक नगरपालिका–८ का ५५ वर्षीय गणेशप्रसाद अधिकारी छन्।
बालिका गत साउन ३१ गते घरबाट निस्किएपछि परिवारको सम्पर्कमा आएकी थिइनन्। आफन्तले खोजी गरिदिन माग गर्दै इलाका प्रहरी कार्यालय दमकमा निवेदन दिएपछि प्रहरीले उनको खोजी सुरु गरेको थियो। खोजीका क्रममा भदौ ४ गते बालिकालाई फेला पारिएको प्रहरीले जनाएको छ।
बालिकालाई सोधपुछ तथा घटनाबारे अनुसन्धान गर्दा पार्वती ऋषिकाले उनलाई प्रलोभनमा पारेर गणेशप्रसाद अधिकारीले सञ्चालन गरेको मनकामना होटल एन्ड लजमा पुर्याएको खुलेको प्रहरीले जनाएको छ। त्यहाँ बालिकालाई यौन शोषणमा लगाइएको पाइएपछि दुवै जनालाई नियन्त्रणमा लिइएको हो।
पक्राउ परेका दुवै जनालाई भदौ ७ गते झापा जिल्ला अदालतमा पेस गरी मानव बेचबिखन तथा ओसारपसारसम्बन्धी कसुरमा म्याद थप गरिएको छ। घटनाबारे प्रहरीले थप अनुसन्धान गरिरहेको जनाएको छ।
