गुल्मी, २८ मंसिर ।
नेपाल प्रेस युनियन गुल्मीका सचिव रमश विश्वकर्मा र सदस्य मनु सुनार सम्मानित भएका छन । गुल्मी युनाइटेड बचत तथा ऋण सहकारी संस्था लिमिटेडद्वारा पत्रकार द्वयलाई सम्मान गरिएको हो । पत्रकार मनु सुनार रेडियो रेसुङ्गा र नवजनचेतना दैनिकका गुल्मी संवाददाता रमेश विश्वकर्मा कार्यरत छन । जिल्लामा क्रियाशिल द्वय पत्रकारलाई दोसल्ला र प्रशंसापत्र सहित सम्मान गरेको छ ।
जिल्लाको रेडियो रेसुङ्गा एफ.एमलाई पनि सम्मान गरेको छ । गुल्मी युनाइटेड बचत तथा ऋण सहकारी संस्था लिमिटेड रेसुङ्गा नगरपालिका–१, गुल्मीले आफ्नो १३ औँ वार्षिक साधारणसभाको अवसरमा रेडियोलाई सम्मान गरेको हो । त्यस अवसरमा सम्मान ग्रहण गर्दै रेडियो रेसुङ्गा सञ्चालक समितिका सदस्य कृष्ण प्रसाद पोख्रेलले संस्थालाई धन्यवाद दिनुभयो । साधारणसभामा आफ्ना दुई जना जेष्ठ शेयर सदस्यलाई समेत सम्मान गरेको छ । रेसुङ्गा नगरपालिका–१ तम्घासकी बसुन्धारा सुवेदी र सुरेशचन्द्र भुसाललाई दोसल्ला र प्रशंसापत्र सहित सम्मान गरेको हो ।
२०७६ सालको एस.ईईमा परीक्षामा उत्कृष्ट अङ्क प्राप्त गरि उत्तीर्ण हुने शेयर सदस्य किशोरप्रसाद मरासिनीकी छोरी शीला मरासिनी, शेयर सदस्य टेकलाल पाण्डेका छोरा कुशल पाण्डे, शेयर सदस्य परशुराम पन्थीकी छोरी प्रभा पन्थी, शेयर सदस्य सूर्य बस्नेतकी छोरी आकृति बस्नेत र शेयर सदस्य लक्ष्मण अर्यालका छोरा समुन्द्र अर्याल लाई सम्मान गरिएको थियो ।
संस्थाले उत्कृष्ट शेयर सदस्यलाई पनि सम्मान गरेको छ । नियमित बचततर्फ राजिब श्रेष्ठ र कारोबार बचततर्फ नरेन्द्र बहादुर बस्नेतलाई सम्मान गरिएको छ । उत्कृष्ट ऋणी शेयर सदस्य तर्फ युवराज पाण्डे सम्मानित हुनुभएको छ । संस्थाबाट वितरित युवा स्वरोजगार कोषको रकम लिई व्यवसायिक कृषि व्यवसाय गर्ने शेयर सदस्यमध्ये उत्कृष्ट कृषि उद्यमीतर्फ मुमाराम अधिकारी तथा व्यवसायिक तरकारी खेतीतर्फ लक्ष्मी भलामीलाई सम्मान गरिएको छ ।
यस्तै त्यस संस्थाको उत्कृष्ट कर्मचारी सम्मान कार्यक्रम अन्तर्गत संस्थामा कार्यरत कम्प्युटर सहायक सावित्रा पाण्डे पुरस्कृत हुनुभएको छ । जिल्ला बचत तथा ऋण संघका अध्यक्ष श्याम कुमार पाण्डेको प्रमुख आतिथ्यता रहेको कार्यक्रममा रेसुङ्गा नगरपालिका–१ का वडाअध्यक्ष अखिलेश्वर प्रसाद पाण्डेको बिशेष आतिथ्यता रहेको थियो । युनाइटेडका पूर्व अध्यक्षहरु दुर्गा प्रसाद पाण्डे, राजकुमार पाण्डे, रेडियो रेसुङ्गा सञ्चालक कृष्ण पोखरेल लगायतको आतिथ्यता रहेको थियो । कार्यक्रमको सञ्चालन सचिव रामप्रसाद पन्थीले गर्नुभएको थियो ।
