काठमाडौं – पूर्व सूचना तथा सञ्चारमन्त्री एवं नेपाली कांग्रेसका केन्द्रीय सदस्य मोहनबहादुर बस्नेतले कोरोना भाइरस संक्रमणबाट आमा गुमाएकी नवजात शिशुलाई पौष्टिक आहाराका लागि तत्काल ५० हजार रुपैयाँ सहयोग गर्ने घोषणा गरेका छन् ।
नेता बस्नेतले तत्काल ५० हजार रुपैयाँ, १२ कक्षासम्म निःशुल्क अध्ययन तथा उच्च शिक्षापश्चात् रोजगारीको समेत ग्यारेन्टीको जिम्मा लिने घोषणा गरेका छन् ।
सिन्धुपाल्चोकका नेता समेत रहेका बस्नेतले सहयोगको घोषणा गरेपछि आपतमा परेका परिवारलाई सहयोग पुगेको छ । सिन्धुपाल्चोककी बाह्रबिसेकी सुत्केरी महिलाको कोरोना संक्रमणका कारण मृत्यु भएको थियो ।
काठमाडौंको त्रिभुवन विश्वविद्यालय शिक्षण अस्पतालमा सुत्केरी भएकी महिला डिस्चार्ज घर भएर बिरामी भएकी थिइन् । काभ्रेको धुलिखेल अस्पतालमा ती महिलालाई मृत घोषणा गरिएको थियो । पछि स्वास्थ्य तथा जनसंख्या मन्त्रालयले कोरोना संक्रमणकै कारण उनको मृत्यु भएको पुष्टि गरेको थियो ।
सोमबार भएको परीक्षणमा आमा गुमाएकी बालिकासहित परिवारका कुनै पनि सदस्यमा कोरोना संक्रमण देखिएको छैन ।
