कपिलवस्तु, भदौँ २८ – वाणगंगा नदीमा आएको अचानक बाढीमा फसेका १२ जनाको सशस्त्र प्रहरीले राति उद्धार गरेको छ।
कपिलवस्तु नगरपालिका–६ बर्मेलीका ११ महिला र एक पुरुष घाँस काट्न नदी पार गरेर वन क्षेत्रमा पुगेका थिए। पहाडी क्षेत्रमा भारी वर्षा भएपछि नदीमा एक्कासि पानीको बहाव बढ्दा उनीहरू फर्कन सकेनन्।
सूचना पाएपछि सशस्त्र प्रहरी बल नं. २८ गण कपिलवस्तुबाट टोली परिचालन गरिएको थियो। टोलीले राति करिब ८ः३० बजे सबैलाई सकुशल उद्धार गरी सुरक्षित स्थानमा ल्याएको हो।
नदीमा अचानक बाढी आउन सक्ने भएकाले स्थानीयवासीलाई नदी तथा खोलानाला आसपास जाँदा विशेष सावधानी अपनाउन प्रहरीले आग्रह गरेको छ।
