नवलपरासी, भदौ २७ – नवलपरासी (पूर्व)को गैँडाकोटमा शनिबार बिहान दुई वटा बस एकआपसमा ठोक्किँदा १८ जना घाइते भएका छन्।
गैँडाकोट नगरपालिका–१२, हर्कपुरस्थित पूर्व–पश्चिम राजमार्गमा बिहान करिब ६ः५० बजे नारायणगढबाट बुटवलतर्फ जाँदै गरेको लु.२ ख ६४५७ नम्बरको बसलाई सोही दिशामा गुडिरहेको लु.२ ख ६०३६ नम्बरको बसले पछाडिबाट ठक्कर दिएको हो।
दुर्घटनामा दुवै बसमा सवार १८ जना घाइते भएको प्रहरीले जनाएको छ। घाइतेमध्ये केहीको नयाँ चितवन मेडिकल कलेज र केहीको पुरानो चितवन मेडिकल कलेजमा उपचार भइरहेको छ।
दुर्घटनामा लु.२ ख ६४५७ नम्बरको बसमा सवार कालिकोट तिलागुफा–३ का ३६ वर्षीय धनमान हमाल र गैँडाकोट–५ की ६० वर्षीया लीला थापा घाइते भएका छन्।
त्यस्तै, लु.२ ख ६०३६ नम्बरको बसका चालक भरतपुर–४ का ४७ वर्षीय सन्तोषबहादुर गुरुङसहित गैँडाकोट, चितवन, गोरखा, बारा, दाङ, रुपन्देहीलगायत स्थानका यात्रुहरू घाइते भएका छन्।
घाइतेमध्ये १२ वर्षीया आत्रिया पौडेल, ११ वर्षीया जस्विन ज्ञवाली, १० वर्षीया दिभा रानाभाट र करिब ८ वर्षीय ऐट्रेन भट्टसमेत रहेका छन्। अन्य घाइतेमा मोहन भैया साह, निशा तिवारी, निमलाल खड्का, अमृता खड्का, मनोज गुरुङ, हुमा गुरुङ, प्रेमबहादुर रानाभाट र मिरा आचार्य रहेका छन्।
घाइते सबैलाई उपचारका लागि भरतपुर पठाइएको प्रहरीले जनाएको छ। दुर्घटनाबारे थप अनुसन्धान भइरहेको छ।
