काठमाडौं, असोज ७ – त्रिपुरेश्वरमा ट्राफिक प्रहरीसँग विवाद भएको केही समयपछि बसमा आगलागी हुँदा गम्भीर घाइते भएका चालक अर्जुन दोङको उपचारका क्रममा मृत्यु भएको छ।
सोमबार दिउँसो रिद्धिसिद्धि यातायातको बस राहदानी विभागअगाडि सडकमा तेर्सिएर रोकिएपछि ट्राफिक प्रहरीले बसलाई साइड लगाउन आग्रह गरेको थियो। त्यसक्रममा चालक र ट्राफिकबीच विवाद भएको र त्यसपछि बसभित्र आगो लागेको प्रहरीको प्रारम्भिक अनुसन्धानबाट खुलेको छ। प्रहरीले बसभित्र चालकबाहेक अन्य व्यक्ति नरहेको जनाएको छ।
घटनाअघि खिचिएको भिडियोमा चालकले आफूलाई बिना कसुर जरिवाना गर्न खोजिएको भन्दै ट्राफिक प्रहरीप्रति असन्तुष्टि जनाएका थिए। उनले आफूले ट्राफिक प्रहरीलाई सम्मान गरेको र माफी मागेको बताउँदै कारबाही गर्न खोजिएको दाबी गरेका थिए। सशस्त्र प्रहरीका कर्मचारीले उनलाई सम्झाउने प्रयास गरेको समेत भिडियोमा देखिन्छ। त्यसपछि चालकले बसका झ्याल र ढोका बन्द गरेपछि केही समयमै बसभित्र आगो लागेको थियो। प्रहरीले प्रारम्भिक रूपमा चालक आफैंले आगो लगाएको हुनसक्ने अनुमान गरे पनि घटनाको अन्तिम निष्कर्ष विस्तृत अनुसन्धानपछि मात्रै आउने जनाएको छ।
अनुसन्धानका क्रममा मृतकको पहिचानसँगै उनको लाइसेन्सबारे पनि फरक तथ्य बाहिर आएको छ। सुरुमा प्रहरीले उनको साथबाट दावा लामाको नाममा रहेको चालक अनुमतिपत्र फेला पारेको थियो। तर परिवारसँगको सोधपुछ र जन्मदर्तालगायत कागजात जाँच गर्दा मृतक मकवानपुरको इन्द्रसरोवर गाउँपालिकाका अर्जुन दोङ रहेको खुलेको प्रहरीको भनाइ छ। प्रहरीले दोङले आफ्नै नामको लाइसेन्स नभई अर्कै व्यक्तिको अनुमतिपत्र प्रयोग गरेर बस चलाएको दाबी गरेको छ।
प्रहरीले दोङको विगतमा पनि ट्राफिक तथा सवारीसम्बन्धी विवाद भएको जनाएको छ। करिब तीन महिनाअघि मूलपानीमा अर्को चालकसँग विवाद हुँदा उनले फलामको लिभर बोकेको घटना सार्वजनिक भएको थियो। त्यतिबेला पनि ट्राफिक प्रहरीसँग अभद्र व्यवहार गरेको प्रहरीको भनाइ छ। त्यस्तै, २०८२ कात्तिकमा बालाजुमा बस दुर्घटना हुँदा तीन जना घाइते भएको घटनामा समेत दोङ नै चालक रहेको र त्यसपछि उनी फरार भएको प्रहरीले जनाएको छ। ती घटनामा पनि उनले फरक व्यक्तिको लाइसेन्स प्रयोग गरेको प्रहरीको दाबी छ।
त्रिपुरेश्वर घटनाको निष्पक्ष छानबिनका लागि काठमाडौं उपत्यका प्रहरी कार्यालय र जिल्ला प्रशासन कार्यालय काठमाडौंले छुट्टाछुट्टै समिति गठन गरेका छन्। प्रहरीको समितिलाई पाँच दिन र प्रशासनको समितिलाई सात दिनको समय दिइएको छ। समितिहरूले घटनाको पृष्ठभूमि, ट्राफिक प्रहरीसँग भएको विवाद, आगलागीको कारण तथा सम्बन्धित तथ्य र प्रमाण अध्ययन गर्नेछन्। यस घटनासँगै ट्राफिक प्रहरी र चालकबीच बारम्बार हुने विवादमा दुवै पक्षको व्यवहार, ट्राफिक प्रहरीको कार्यशैली, चालकको मनोसामाजिक अवस्था र सडक सुरक्षासम्बन्धी विषयमा पनि बहस सुरु भएको छ।
अर्जुनका दाजु विपिन दोङ भने भाइको मृत्युले परिवारलाई ठूलो क्षति पुगेको भन्दै न्याय र क्षतिपूर्तिको माग गरिरहेका छन्। उनका अनुसार अर्जुन २२ वर्षका थिए र करिब तीन वर्षदेखि चालकको काम गर्दै आएका थिए। परिवारको आर्थिक अवस्था कमजोर रहेको बताउँदै उनले घटनाको वास्तविकता बाहिर ल्याउनुपर्ने र दोषी देखिए कारबाही हुनुपर्ने माग गरेका छन्। ‘भाइले न्याय पाउनुपर्छ, त्यसपछि मात्रै शव बुझ्छौं’ भन्दै उनले यस्तै घटना फेरि कसैको परिवारमा नदोहोरियोस् भन्ने चाहना व्यक्त गरेका छन्।
