धादिङ, असोज १ – धादिङको कृष्णभीर क्षेत्रमा सडक भासिएर अवरुद्ध बनेको पृथ्वी राजमार्ग १८ दिनपछि पुनः दुईतर्फी सञ्चालनमा आएको छ। भदौ १० र १४ गते रसुवाको भोटेकोशी नदीमा आएको आकस्मिक तथा विनाशकारी बाढीका कारण कृष्णभीर क्षेत्रमा सडक धसिएपछि काठमाडौँसँगको सडक सम्पर्क प्रभावित बनेको थियो। सडक डिभिजन कार्यालयले पुरानो सडकको विकल्पमा नयाँ ट्र्याक निर्माण गरी असोज १ गते बिहीबार बिहान ६ बजेदेखि दुवैतर्फ सवारी सञ्चालनमा ल्याएको हो।
नयाँ ट्र्याक खुलेसँगै पृथ्वी राजमार्गमा रोकिएको नियमित आवागमन पुनः सुरु भएको छ। सडक निर्माणका क्रममा पहिरो गएको भागलाई व्यवस्थापन गर्दै नयाँ मार्ग तयार पारिएको र आवश्यक संरचना बनाएर यातायात सञ्चालन गरिएको हो। लामो समयदेखि अवरुद्ध राजमार्ग खुलेपछि काठमाडौँ आउने–जाने यात्रु तथा मालवाहक सवारीलाई ठूलो राहत पुगेको छ।
यद्यपि कृष्णभीरलगायत राजमार्गका विभिन्न स्थानमा सडक भासिने, पहिरो जाने तथा ढुंगा–माटो खस्ने जोखिम अझै कायम रहेको प्रशासनले जनाएको छ। वर्षा भइरहेको समयमा वा सडकमा अवरोध देखिएमा जोखिम मोलेर यात्रा नगर्न तथा सडक व्यवस्थापनमा खटिएका सुरक्षाकर्मी र कर्मचारीको निर्देशन पालना गर्न यात्रु तथा चालकलाई आग्रह गरिएको छ।
