काठमाडौँ, भदौ ३० – सप्तकोशी नदीमा पानीको बहाव तीव्र रूपमा बढेपछि कोशी ब्यारेजका २३ वटा ढोका खोलिएका छन्। नदीको जलसतह खतराको तहमा पुगेपछि ब्यारेजमा थप सतर्कता अपनाइएको हो।
बिहान ७ः१५ बजेको विवरणअनुसार सप्तकोशीमा पानीको बहाव प्रतिसेकेन्ड १ लाख ८१ हजार ७ सय ७५ क्युसेक पुगेको छ।
ब्यारेज नियन्त्रण कक्षका अनुसार नदीमा पानीको बहाव अझै बढिरहेको छ। जलसतह खतराको बिन्दुमा पुगेसँगै कोशी आसपासका क्षेत्रमा जोखिमसमेत बढेको छ।
यसैबीच, स्थानीय प्रशासनले सुनसरी र सप्तरीका कोशी तटीय क्षेत्रका बासिन्दालाई उच्च सतर्कता अपनाउन आग्रह गरेको छ। प्रशासनले नदीको अवस्था निरन्तर निगरानी गरिरहेको जनाएको छ।
