काठमाडौं, असोज ५ – नेकपा एमालेभित्र निर्वाचन समीक्षा र पार्टी पुनर्गठनका लागि तयार पारिएको कार्यदलको प्रतिवेदनलाई लिएर सहमति जुट्न सकेको छैन। केन्द्रीय कमिटी बैठक बस्नुअघि प्रतिवेदन टुंग्याउने प्रयास भए पनि अध्यक्ष केपी शर्मा ओलीले केही महत्वपूर्ण विषयमा असहमति जनाएपछि प्रक्रिया लम्बिएको हो।
स्रोतका अनुसार कार्यदलले आइतबार तयार पारेको माइन्युटप्रति ओलीले असहमति जनाएपछि सोमबार बिहान ९ बजे सचिवालय बैठक बोलाइएको छ। कार्यदलको पहिलो निर्णयमै अध्यक्ष ओलीले आपत्ति जनाएपछि प्रतिवेदनलाई अन्तिम रूप दिन समस्या भएको बताइएको छ।
कार्यदलले महासचिव शंकर पोखरेलले तयार पारेको प्रारम्भिक प्रतिवेदनलाई आधार बनाएर तीनवटा प्रतिवेदनलाई एकीकृत गरेको थियो। त्यस क्रममा केही बुँदा संशोधन गरी प्रतिवेदन सचिवालयमा पेस गरिएको थियो। तर, विभिन्न १३ समूहबाट आएका सुझावलाई कुनै परिवर्तन नगरी प्रतिवेदनको अनुसूचीमा राख्ने प्रस्तावमा ओली सहमत नभएको स्रोतको भनाइ छ।
ओलीको अर्को असहमति प्रतिनिधि परिषद्को बैठक बोलाउने प्रस्तावमा रहेको बताइएको छ। यी दुई विषयमा अध्यक्ष ओली र कार्यदलका बहुमत सदस्यबीच सहमति नजुटेपछि आइतबारको बैठक निष्कर्षमा पुग्न सकेन।
कार्यदलमा उपाध्यक्ष विष्णुप्रसाद पौडेल, पृथ्वीसुब्बा गुरुङ, महासचिव शंकर पोखरेल र सचिव डा. राजन भट्टराईलगायतका नेता छन्। उनीहरू कार्यदलबाट अघि सारिएका प्रस्तावहरू हटाउने पक्षमा नरहेको बताइएको छ।
अब सोमबार बिहान बस्ने सचिवालय बैठकले यी विवादित विषयमा सहमति खोज्ने प्रयास गर्नेछ। तर, ओलीले उठाएका दुवै विषयमा तत्काल सहमति जुट्ने सम्भावना कम रहेको एमाले स्रोतको दाबी छ। त्यसैले केन्द्रीय कमिटी बैठकअघि नै प्रतिवेदन सर्वसम्मत रूपमा पारित हुने वा थप छलफलका लागि प्रक्रिया लम्बिने विषयमा अझै अन्योल कायमै छ।
