काठमाडौँ, भदौ २९ – हरितालिका तीजको अवसरमा पशुपतिनाथ मन्दिरमा दर्शन गर्ने भक्तजनको संख्या बढेको छ। सोमबार बिहान १० बजेसम्म १८ हजार भक्तजनले पशुपतिनाथको दर्शन गरिसकेको प्रहरीले जनाएको छ।
जिल्ला प्रहरी परिसर काठमाडौँका एसपी दानबहादुर थापाका अनुसार बिहानदेखि नै भक्तजनहरू दर्शनका लागि पशुपति क्षेत्रमा पुगेका थिए।
भक्तजनको चापलाई मध्यनजर गर्दै पशुपतिनाथ क्षेत्रमा सुरक्षा व्यवस्था पनि कडा पारिएको छ। सुरक्षाका लागि २ हजार ५ सय नेपाल प्रहरी र ८ सय सशस्त्र प्रहरी परिचालन गरिएको छ।
यद्यपि, सुरक्षा अधिकारीहरूले गत वर्षको तीजको तुलनामा यस वर्ष पशुपतिनाथमा दर्शन गर्न आउने भक्तजनको संख्या केही कम रहेको बताएका छन्। प्रहरीले दर्शनार्थीको सहज आवागमन र सुरक्षाका लागि आवश्यक व्यवस्थापन गरिरहेको जनाएको छ।
