दाङ, भदौ ७ – दाङको घोराहीमा छोराको हत्या भएको खबर सुनेपछि एक आमाको मृत्यु भएको छ। घोराही उपमहानगरपालिका–१७ हरिद्वारकी ३८ वर्षीया बिना कालाथोकीको आइतबार दिउँसो मृत्यु भएको हो।
बिनाका २२ वर्षीय जेठा छोरा वसन्त कालाथोकीको काठमाडौँको शंखमूलस्थित भ्याली ब्वाइज होस्टलमा हत्या भएको थियो। विदेश जाने तयारीमा रहेका वसन्त काठमाडौँमा बसेर भाषा अध्ययन गरिरहेका थिए। होस्टलमै कुटपिट तथा धारिलो हतियार प्रहारबाट घाइते भएका उनको उपचारका क्रममा मृत्यु भएको प्रहरीले जनाएको छ।
छोराको मृत्युको खबर घरमा पुगेपछि बिना गम्भीर भावनात्मक आघातमा परेको स्थानीयले बताएका छन्। दिउँसो करिब ३ बजेतिर घरमै उनको मृत्यु भएको जिल्ला प्रहरी कार्यालय दाङका प्रमुख एसपी दीपक श्रेष्ठले जानकारी दिए। घटनाबारे जानकारी पाएपछि प्रहरी टोली तत्काल घर पुगेको थियो।
बिनाको शव पोस्टमार्टमका लागि राप्ती स्वास्थ्य विज्ञान प्रतिष्ठानको शवगृहमा राखिएको छ। उनका श्रीमान् रोमहर्श कालाथोकी रोजगारीका क्रममा मलेसियामा रहेकाले उनी सोमबार नेपाल फर्किने तयारीमा छन्। श्रीमान् फर्किएपछि मात्रै पोस्टमार्टमलगायतका प्रक्रिया अघि बढाउने तयारी गरिएको छ।
घरमा आमासँगै रहेका ११ वर्षीय कान्छा छोरा शिशिरलाई अहिले हजुरबुवाको जिम्मा लगाइएको वडाध्यक्ष रामलौटन चौधरीले बताए। परिवारमा एकैपटक जेठो छोराको हत्या र आमाको मृत्यु भएपछि घोराही–१७ को टोल नै शोकमा डुबेको छ।
वसन्तको हत्या आरोपमा सोही होस्टलमा बस्दै आएका बारा कलैया–३ का २० वर्षीय प्रमित पटेल र १८ वर्षीय शेखर यादव पक्राउ परेका छन्। प्रहरीले शेखरलाई काठमाडौँबाट र प्रमितलाई मकवानपुरबाट पक्राउ गरेको हो। घटनाबारे थप अनुसन्धान भइरहेको प्रहरीले जनाएको छ।
