बुटवल, साउन २४ – तीन दिनदेखि बेपत्ता रहेका कपिलवस्तु नगरपालिकाका पूर्वमेयर तथा नेपाली कांग्रेसका नेता किरण सिंहको शव फेला परेको छ।
६५ वर्षीय सिंहको शव आइतबार गोरुसिंगे जंगल क्षेत्रमा फेला परेको जिल्ला प्रहरी प्रमुख एसपी मनोहर भट्टले जानकारी दिएका छन्।
सिंह शुक्रबार दिउँसो करिब २ बजे कपिलवस्तु–३ स्थित घरबाट मोटरसाइकल लिएर निस्किएका थिए। घरबाट निस्किएपछि सम्पर्कविहीन भएका उनको खोजीमा प्रहरी टोली परिचालन गरिएको थियो।
खोजीका क्रममा पूर्व–पश्चिम राजमार्गदेखि करिब आठ किलोमिटर भित्र जंगलमा सिंहले प्रयोग गर्दै आएको लु प्र ०१०१३ प ७९७० नम्बरको मोटरसाइकल भेटिएको थियो।
मोटरसाइकल जंगलमा भेटिएपछि प्रहरीले उनको खोजीलाई थप तीव्र बनाएको थियो। खोजी कार्यमा गौतमबुद्ध विमानस्थलबाट तालिमप्राप्त कुकुरसमेत परिचालन गरिएको थियो।
तीन दिनसम्मको खोजीपछि आइतबार जंगलमा सिंहको शव भेटिएको प्रहरीले जनाएको छ। उनको मृत्यु कसरी भयो भन्नेबारे भने प्रहरीले अनुसन्धान अघि बढाएको छ। घटनाको थप विवरण अनुसन्धानपछि खुल्ने बताइएको छ।
