काठमाडौं, साउन २० – एलपीजी ग्यासको आपूर्ति र वितरणमा देखिने समस्या तत्काल समाधान गर्न नेपाल आयल निगमले क्विक रेस्पोन्स टिम गठन गरेको छ। उद्योग, वाणिज्य तथा आपूर्ति मन्त्री गौरीकुमारी यादवको निर्देशनपछि गठन गरिएको उक्त टोली बुधबारदेखि नै सक्रिय भएको हो।
उद्योग मन्त्रालयका अनुसार उपभोक्ताले ग्यास अभावको समस्या भोग्न नपरोस् भन्ने उद्देश्यले उद्योग मन्त्रालय, नेपाल आयल निगम, उद्योग विभाग र ग्यास उद्योगका प्रतिनिधिहरूलाई समेटेर संयुक्त संयन्त्र तयार गरिएको हो।
गठित टोलीमा उद्योग मन्त्रालयका मङ्गल बिष्ट, नेपाल आयल निगमका इन्दु श्रेष्ठ र उपेन्द्र सुवेदी तथा ग्यास उद्योगका आयुस नेपाल र कुलप्रसाद राई सदस्यका रूपमा रहेका छन्।
यो टोलीले देशका जुनसुकै स्थानमा ग्यासको अभाव, ढुवानी वा वितरणसम्बन्धी समस्या देखिए तत्काल सम्बन्धित निकायसँग समन्वय गरी समाधानका लागि आवश्यक पहल गर्नेछ। पछिल्लो समय विभिन्न जिल्लाबाट ग्यास आपूर्तिसम्बन्धी गुनासो बढ्न थालेपछि यस्तो व्यवस्था लागू गरिएको निगमले जनाएको छ।
निगमले कार्यालय समयभित्र हटलाइनमार्फत प्राप्त हुने उजुरीलाई प्राथमिकताका साथ सम्बोधन गर्ने जनाएको छ। उपभोक्ताले एलपीजी ग्याससम्बन्धी समस्या परे ०१–५९७१९०२ नम्बरमा सम्पर्क गर्न सक्नेछन्। सो नम्बरमा प्राप्त गुनासोमाथि क्विक रेस्पोन्स टिमले तत्काल आवश्यक समन्वय गरी समाधान प्रक्रिया अघि बढाउने निगमको भनाइ छ।
