काठमाडौं, साउन १० -सिन्धुपाल्चोकको भोटेकोसी नदीमा विद्युतीय गाडी खसेर चालक बेपत्ता भएपछि गृहमन्त्री सुधन गुरुङ घटनास्थल पुगेर खोज तथा उद्धार कार्यको अनुगमन गरेका छन्।
शनिबार साँझ भएको दुर्घटनापछि बेपत्ता चालकको खोजीलाई तीव्र बनाउन तीनवटै सुरक्षा निकाय परिचालन गरिएको छ। घटनास्थलको निरीक्षण गरेका गृहमन्त्री गुरुङले सुरक्षाकर्मीलाई आवश्यक निर्देशन दिँदै उद्धारमा खटिएका टोलीको मनोबल बढाएका छन्।
प्रमुख जिल्ला अधिकारी नरेन्द्र परियारका अनुसार कालिका गाउँपालिका–३ तल्लो धारापानी निवासी २२ वर्षीय सविन तामाङको खोजीका लागि गोताखोरसहित सुरक्षाकर्मी परिचालन गरिएको छ। खोजी कार्यलाई प्रभावकारी बनाउन १० वटा ड्रोनसमेत प्रयोगमा ल्याइएको उनले जानकारी दिए।
जिल्ला विपद् व्यवस्थापन समितिले खोज तथा उद्धार अभियानको समन्वय गरिरहेको जनाएको छ। समितिका अनुसार दुर्घटनास्थल अत्यन्त गहिरो खोँचमा रहेको, नदीको पानी धमिलो भएको तथा किनारमा ठूला चट्टानहरू रहेकाले उद्धार कार्य चुनौतीपूर्ण बनेको छ।
बेपत्ता चालकको अवस्था अझै अज्ञात रहेको र खोजी अभियान निरन्तर जारी रहेको जिल्ला प्रशासनले जनाएको छ।
