चितवन, साउन ८ – चितवनको इच्छाकामना गाउँपालिकाका ३४ भूमिहीन दलित, भूमिहीन सुकुम्बासी तथा अव्यवस्थित बसोबासी परिवारले जग्गाधनी दर्ता प्रमाण–पुर्जा (लालपुर्जा) प्राप्त गरेका छन्।
जिल्ला भूमि समस्या समाधान समिति, चितवनले आयोजना गरेको कार्यक्रममा लाभग्राही परिवारलाई लालपुर्जा वितरण गरिएको हो। लामो समयदेखि आफूले भोगचलन गर्दै आएको जग्गामा कानुनी स्वामित्व नपाएका उनीहरू लालपुर्जा प्राप्त गरेसँगै अब औपचारिक रूपमा जग्गाधनी बनेका छन्।
सरकारले भूमिहीन दलित, सुकुम्बासी तथा अव्यवस्थित बसोबासीको समस्या समाधानलाई प्राथमिकतामा राख्दै देशभर जग्गाधनी प्रमाण–पुर्जा वितरण अभियानलाई तीव्रता दिएको जनाएको छ। यस अभियानमार्फत वर्षौंदेखि स्वामित्वविहीन अवस्थामा रहेका परिवारलाई कानुनी अधिकार सुनिश्चित गर्ने लक्ष्य लिइएको छ।
यसैक्रममा झापाको कनकाई नगरपालिकामा पनि पाँच भूमिहीन दलित तथा अव्यवस्थित बसोबासी परिवारलाई जग्गाधनी दर्ता प्रमाण–पुर्जा प्रदान गरिएको छ। पुर्जा वितरणसँगै ती परिवारले पनि सम्बन्धित जग्गामा कानुनी स्वामित्व प्राप्त गरेका छन्।
सरकारले विभिन्न जिल्लामा लालपुर्जा वितरण कार्यक्रमलाई निरन्तर विस्तार गर्दै भूमिहीन नागरिकलाई कानुनी रूपमा जग्गाधनी बनाउने अभियानलाई प्रभावकारी रूपमा अघि बढाइरहेको जनाएको छ।
