चितवन, असार ३२ – मानव–हात्ती द्वन्द्व न्यूनीकरणका लागि चितवन राष्ट्रिय निकुञ्जले समस्या सिर्जना गर्दै आएको ध्रुवे हात्तीमा रेडियो कलर जडान गरेको छ। अब हात्तीको गतिविधि नियमित रूपमा निगरानी गरिने र बस्तीमा पस्नुअघि नै जानकारी प्राप्त हुने जनाइएको छ।
असार २० गते भरतपुर–२३ बेलहटामा ध्रुवे हात्तीको आक्रमणबाट २५ वर्षीया आशिका बोटे र उनका ४ वर्षीय छोरा भरत बोटेको मृत्यु भएपछि दीर्घकालीन समाधानको माग उठेको थियो। त्यसपछि कृषि, वन तथा वातावरण मन्त्री गीता चौधरीले पीडित परिवारलाई भेट्दै आवश्यक कदम चाल्न निर्देशन दिनुभएको थियो।
मन्त्रीको निर्देशनपछि चितवन राष्ट्रिय निकुञ्ज, राष्ट्रिय प्रकृति संरक्षण कोष, नेपाली सेना र स्थानीय तहको समन्वयमा ध्रुवे हात्तीको खोजी तथा निगरानी तीव्र बनाइएको थियो।
निरन्तर अनुगमनका क्रममा साउन ३१ गते साँझ निकुञ्जभित्रको सुखीभार पोस्ट नजिक ध्रुवे हात्ती फेला परेपछि विशेषज्ञ टोलीले सफलतापूर्वक रेडियो कलर जडान गरेको हो।
रेडियो कलरमार्फत हात्तीको जीपीएस अवस्थिति र गतिविधिको जानकारी नियमित रूपमा प्राप्त हुने भएकाले जोखिमयुक्त क्षेत्रमा समयमै सतर्कता अपनाउन र बस्तीमा प्रवेश गर्नुअघि सूचना दिन सहज हुने विश्वास गरिएको छ।
चितवन राष्ट्रिय निकुञ्जले रेडियो कलरको माध्यमबाट ध्रुवे हात्तीको निरन्तर निगरानी गर्दै मानव–हात्ती द्वन्द्व न्यूनीकरणका लागि आवश्यक व्यवस्थापनका कार्यलाई अघि बढाइने जनाएको छ।
