काठमाडौं, असार २६ – त्रिपुरेश्वरस्थित राहदानी विभाग अगाडि गणेश नेपालीले आत्मदाह प्रयास गरेको घटनामा प्रत्यक्षदर्शी रन्जु ढकालले महानगर प्रहरीको व्यवहारमाथि प्रश्न उठाएकी छन्। उनले मोटरसाइकल पार्किङको विषयमा सुरु भएको विवाद लामो समयसम्म चलेपछि घटना गम्भीर बनेको दाबी गरेकी छन्।
ढकालका अनुसार गणेशले नो पार्किङ क्षेत्रमा मोटरसाइकल राखेका थिए। महानगर प्रहरीले हटाउन भनेपछि गणेशले केहीबेरमै लैजाने बताएका थिए। तर, मोटरसाइकलमा ह्विल लक लगाएपछि उनीहरूबीच विवाद बढेको उनले बताइन्।
उनका अनुसार घटनास्थलमा लामो समयसम्म भनाभन र छलफल चलेको थियो। पछि अन्य प्रहरीसमेत पुगेका थिए। छलफल भइरहेकै क्रममा गणेशले अचानक पेट्रोल निकालेर शरीरमा खन्याउँदै दौडिएको ढकालले बताइन्।
“उहाँ दौडिँदै आउँदा पेट्रोलका छिट्टा मेरो हातमा समेत परे। बच्चा साथमा भएकाले म निकै डराएँ र सुरक्षित स्थानतर्फ गएँ,” उनले भनिन्।
घटना भएपछि उद्धारमा ढिलाइ भएको भन्दै उनले प्रहरीको भूमिकामाथि असन्तुष्टि व्यक्त गरेकी छन्। गणेश आगोले जलेर ढलेपछि पनि तत्काल उद्धारभन्दा मोटरसाइकल व्यवस्थापनमा ध्यान गएको उनको आरोप छ। स्थानीय व्यक्तिहरूले पानी ल्याएर आगो निभाउन सहयोग गरेको उनले बताइन्।
प्रत्यक्षदर्शी ढकालले घटनाको निष्पक्ष छानबिन गर्न माग गर्दै सीसीटीभी फुटेज जाँच गर्नुपर्ने बताएकी छन्। पार्किङ नियम उल्लंघन भए पनि परिस्थितिलाई नियन्त्रणमा लिन संयमता आवश्यक रहेको उनको भनाइ छ।
यस घटनापछि गणेश नेपालीको अवस्था र घटनाको कारणबारे सम्बन्धित निकायले अनुसन्धान अघि बढाइरहेको छ।
