काठमाडौं, असार २५ – काठमाडौंको त्रिपुरेश्वरस्थित राहदानी विभाग अगाडि आफ्नै शरीरमा आगो लगाएर आत्मदाह प्रयास गर्ने युवकको पहिचान खुलेको छ।
प्रहरीका अनुसार आत्मदाह प्रयास गर्ने व्यक्ति मुगुको सोरु गाउँपालिका–१ घर भई हाल भक्तपुर बस्दै आएका २५ वर्षीय गणेश नेपाली रहेको खुलेको हो।
बिहीबार दिउँसो करिब १:४५ बजे काठमाडौं महानगरपालिका–११ त्रिपुरेश्वरस्थित राहदानी विभागको ३ नम्बर गेट नजिकै उनले आफ्नै शरीरमा आगो लगाएका थिए।
प्रारम्भिक अनुसन्धानअनुसार नेपालीले आफूले चढेर आएको मोटरसाइकलबाट पेट्रोल निकालेर शरीरमा छर्किएपछि आगो लगाएको प्रहरीले जनाएको छ।
घटनापछि तत्कालै सुरक्षाकर्मीले उद्धार गरी उनलाई उपचारका लागि वीर अस्पताल पुर्याएका थिए। हाल उनको वीर अस्पतालमै उपचार भइरहेको छ भने अवस्था गम्भीर रहेको अस्पताल स्रोतले जनाएको छ।
प्रहरीका अनुसार उनको शरीरका विभिन्न भागमा आगोले असर गरेको छ। जिल्ला प्रहरी परिसर काठमाडौंका एसपी पवन भट्टराईका अनुसार उनी हाल सामान्य बोल्न सक्ने अवस्थामा छन्।
घटनाको कारणबारे भने प्रहरीले थप अनुसन्धान गरिरहेको जनाएको छ।
