संसदीय दलको नेता हटाउने प्रावधानलाई गलत अर्थ लगाउन हुँदैन : गणेश पराजुली

काठमाडौं, असार २४ – राष्ट्रिय स्वतन्त्र पार्टी (रास्वपा) संसदीय दलका उपनेता गणेश पराजुलीले पार्टीको संशोधित विधानमा रहेको संसदीय दलको नेता हटाउन सकिने व्यवस्थालाई गलत ढंगले व्याख्या गर्न नहुने बताएका छन् ।

बुधबार सिंहदरबारस्थित संसद भवन परिसरमा सञ्चारकर्मीसँग कुरा गर्दै पराजुलीले उक्त प्रावधान कुनै व्यक्तिलाई लक्षित गरेर नभई पार्टीलाई व्यवस्थित र प्रभावकारी बनाउन राखिएको दाबी गरे ।

उनका अनुसार संशोधित विधान केन्द्रीय समितिमा छलफल गरी पारित गरिएको हो । विधानमा सभापतिदेखि अन्य पदाधिकारी र सदस्यसम्मको चयन प्रक्रिया तथा पदमुक्त हुने अवस्थासमेत स्पष्ट गरिएको उनले बताए ।

सभापतिको निर्देशन अवज्ञा गरेमा संसदीय दलको नेता हटाउन सकिने व्यवस्थाबारे भइरहेको चर्चालाई उनले अपव्याख्या भएको बताए । पार्टीको विधान निर्माण गर्दा कुनै व्यक्ति वा पदलाई केन्द्रमा नराखी भविष्यमा पार्टी सञ्चालनलाई सहज बनाउने उद्देश्य राखिएको उनको भनाइ छ ।