काठमाडौं, असार २२ – नेपाली कांग्रेसको संस्थापन इतर समूहले आफ्नो छुट्टै कार्यालय सञ्चालनमा ल्याएको छ। सोमबार आयोजित कार्यक्रममा समूहका संयोजक तथा पूर्वकार्यवाहक सभापति पूर्णबहादुर खड्काले कार्यालयको उद्घाटन गर्दै आगामी राजनीतिक गतिविधिलाई अझ व्यवस्थित रूपमा अघि बढाइने बताएका छन्।
उद्घाटन कार्यक्रममा कांग्रेसका नेता शशांक कोइराला, प्रकाशमान सिंह, विमलेन्द्र निधि, कृष्णप्रसाद सिटौला लगायतका नेताहरूको उपस्थिति रहेको थियो। कार्यालय उद्घाटनअघि समूहका नेताहरूबीच समसामयिक राजनीतिक विषयमा छलफलसमेत भएको थियो।
छलफलका क्रममा खड्काले समूहको पछिल्लो अवस्थाबारे जानकारी दिँदै हाल आफूहरूसँग शेखर कोइरालासहित १११ जना रहेको र केन्द्रीय कार्यसमितिमा सोही संख्यामा प्रतिनिधित्व सुनिश्चित गर्न प्रस्ताव राखिएको बताए। सातबुँदे प्रस्तावको जवाफ लिखित रूपमा दिन उपसभापति विश्वप्रकाश शर्मासँग भएको संवादबारे पनि उनले नेताहरूलाई जानकारी गराएका थिए।
खड्काका अनुसार विश्वप्रकाश शर्माले आफू र शेखर कोइरालालाई वरिष्ठ नेताको जिम्मेवारी दिने विषयमा सहमति बनेको जानकारी गराएका थिए। तर उक्त प्रस्ताव आफूले स्वीकार नगरेको उनको भनाइ थियो। त्यसपछि थप छलफलको अपेक्षा गरे पनि कुनै औपचारिक प्रतिक्रिया नआएको उनले बताए।
महामन्त्री प्रदीप पौडेललाई उद्धृत गर्दै शीर्ष नेताको सदस्यता स्वतः नवीकरण हुने विषयमा समाचार सार्वजनिक भएपछि देशभरबाट कार्यकर्ताहरूको प्रतिक्रिया आएको र आफूले सामाजिक सञ्जालमार्फत त्यसको खण्डन गरेपछि भ्रम हटेको खड्काले उल्लेख गरे।
खड्काले अब लगातार दुई–तीन दिन समूहभित्र नियमित छलफल हुने जानकारी दिँदै साउन ६ गते पर्ने बीपी जयन्तीलाई विशेष कार्यक्रमका साथ मनाउने तयारी भइरहेको पनि बताएका छन्।
