काठमाडौं, असार २१ – गृहमन्त्री सुधन गुरुङले त्रिभुवन अन्तर्राष्ट्रिय विमानस्थलस्थित अध्यागमन कार्यालयमा कार्यरत कर्मचारीलाई कार्यालय समयमा अनिवार्य रूपमा ढाका टोपी लगाउन निर्देशन दिएका छन्।
शुक्रबार राति विमानस्थलको निरीक्षण तथा अनुगमनका क्रममा उनले विदेशी नागरिकले नेपाल प्रवेश गर्दा सबैभन्दा पहिले अध्यागमन कार्यालयसँगै सम्पर्क हुने भएकाले कर्मचारीको पोसाक, व्यवहार र सेवाले देशको छवि झल्काउने बताएका हुन्। त्यसैले नेपाली मौलिकता, संस्कृति र राष्ट्रिय पहिचान झल्किने गरी ढाका टोपी अनिवार्य लगाउन निर्देशन दिइएको स्रोतले जनाएको छ।
गृहमन्त्री गुरुङले सेवाग्राहीमैत्री, अनुशासित र मर्यादित सेवा प्रवाहसँगै नेपाली पहिचानलाई प्रवर्द्धन गर्ने उद्देश्यले यस्तो व्यवस्था गर्न लागिएको बताएका छन्।
यसअघि सरकारले लागू गरेको ‘सार्वजनिक निकायमा स्वदेशी वस्तुको प्रयोगसम्बन्धी निर्देशिका–२०८१’ ले पनि सार्वजनिक निकायमा कार्यरत कर्मचारी तथा पदाधिकारीलाई उपलब्ध भएसम्म स्वदेशी उद्योगबाट उत्पादित पोशाक प्रयोग गर्नुपर्ने व्यवस्था गरेको छ। साथै, सार्वजनिक निकायबाट प्रदान गरिने उपहारमा समेत स्वदेशी वस्तुको प्रयोग गर्नुपर्ने उल्लेख गरिएको छ।
