शुद्धोधन प्याब्सनद्वारा राहत हस्तान्तरण

फर्साटिकर रुपन्देही
बैशाख ९
रुपन्देहीको शुद्धोधन गाउँपालिकामा क्रियाशील निजि बिद्यालयहरुको संस्था शुद्धोधन प्याब्सनले कोरोना महामारीको कारणले लकडाउन हुँदा प्रभावित भएका अतिबिपन्न,मजदुरी गर्ने परिवारलाई राहत वितरण गर्नका लागि खाद्यान्न गाउँपालिकालाई हस्तान्तरण गरेको छ।

बिश्वब्यापी महामारीको रुपमा फैलिएको कोरोना भाइरसको सम्भावित जोखिम न्यूनीकरण लागि नेपाल सरकारले गरेको लकडाउनको कारणले रोजगारी गुमेका,दैनिक ज्यालादारी गरी जीवननिर्वाह गर्ने बिपन्न परिवारलाई राहत बितरण गर्ने गाउँपालिकाको कार्यक्रमलाई शुद्धोधन प्याब्सनको तर्फबाट सहकार्य गर्दै शुद्धोधन गाउँपालिकामा क्रियाशील १० निजि विद्यालयले ५ क्विन्टल ६० किलो चामल, २८ किलो दाल,१४ लिटर तेल,२८ किलो नुन सहयोग गरेका हुन्।

हस्तान्तरण कार्यक्रममा बोल्दै शुद्धोधन गाउँपालिका अध्यक्ष किसुनचन्द चौधरीले कोरोना भाइरसको महामारीको समयमा गाउँपालिकाले विपन्न परिवारलाई गर्दै आएको राहत वितरण कार्यक्रममा शुद्धोधन प्याब्सनले सहकार्य गरि सहयोग गरेकोमा धन्यवाद व्यक्त गर्नुभयो ।

शुद्धोधन प्याब्सनका अध्यक्ष पानकुमार फौदारले गाउँपालिकालाई राहत हस्तान्तरण अझै धेरै गर्न खोजेपनी केन्द्रिय राहत कोषमा पनि प्याब्सनले खाद्यान्न सहयोग गर्नुपर्ने भएकाले राहत स्वरुप केही मात्रामा खाद्यान्न सामग्री हस्तान्तरण गरेको जानकारी गराउदै लक्षित बिपन्न परिवारमा राहतले चुलो बोल्ने बिश्वास व्यक्त गर्नुभयो।

कार्यक्रममा गाउँपालिकाका प्याब्सनको तर्फबाट ८ वटा विद्यालयका प्रबन्ध निर्देशक ,गाउँपालिकाको तर्फबाट अध्यक्ष किशुनचन्द चौधरी, वडाअध्यक्षहरू विष्णु बस्याल, राजेन्द्र कंडेल, हेमबहादुर खड्का, जयशंकर पाठक
उपस्थिति रहेको थियो।

यसैगरि केही दिन अघि तिनाउ मिसन डेभलपमेन्ट बैंक लिमिटेड फर्साटिकर र मानपकडी शाखाले गाउँपालिकालाई ५ क्विन्टल चामल,३५ किलो दाल,१० लिटर तेल,५० किलो नुन हस्तान्तरण गरेको थियो।