नेपाल आयल निगमले कोरोना भाइरस सङ्क्रमण रोकथाम, नियन्त्रण तथा उपचार कोषमा रु.५० करोड सहयोग गरेको छ। निगम सञ्चालक समितिको बुधबार बसेको बैठकले उक्त सहयोग गर्ने निर्णय गरेको हो।
सो रकम बराबरको चेक आज (बिहीबार) प्रधानमन्त्री तथा मन्त्रिपरिषद्को कार्यालयलाई हस्तान्तरण गरिएको निगमका प्रवक्ता विनितमणि उपाध्यायले जानकारी दिए।
कोरोना भाइरसको सङ्क्रमण रोकथाम, नियन्त्रण र उपचारको तयारीका लागि सरकारले कोषको स्थापना गरेको थियो। कोषमा विभिन्न व्यक्ति तथा संस्थाले आर्थिक सहयोग गरेका छन्।
निगमले राष्ट्रिय आवश्यकता, प्राकृतिक विपद्, भूकम्प तथा बाढी पहिरो जस्ता प्रकोपका समयमा संस्थागत सामाजिक उत्तरदायित्व बोध गरी राहत तथा सहयोग गर्दै आएको छ।
