विवश विष्ट
गुल्मी, २० चैत।
गुल्मीको मदाने गाउपालिकाको केन्द्र पुर्कोटदहमा बनाइएको क्वारेन्टाइनमा ८ जना व्यक्ति भर्ना गरिएको छ। भारतबाट यस गाउँपालिकामा प्रवेश गरेका व्यक्तिहरुलाई क्वारेन्टाइनमा राखिएको हो।
बिश्वब्यापी फैलिएको कोरोना भाइरस अर्थात कोभिड १९ को सम्भावित जोखिम न्यूनीकरणका लागि मदाने गाउपालिकामा स्थापना गरिएको २१ बेडको क्वारेन्टाइन मध्ये गाउँपालिकाको केन्द्र पुर्कोटदहमा ११ बेडमा ८ जना राखिएको छ भने वडा न.१ अग्लुङ्गमा बनाइएको १० बेडको अझै खाली छ। भर्ना गरिएको ८ जना व्यक्तिहरु इन्डियाबाट आएका हुन।जसमा २ जना अग्लुङ्गका, ४ जना बाझकटेरीका,१ जना सिर्सेनीका र १ जना भनभनेका गरि ८ जनालाई क्वारेन्टाइनमा राखिएको गाउँपालिकाका उपाध्यक्ष सरिता खड्काले बताउनु भयो।
कोरोनाको संभावित संक्रमित नियन्त्रणका गर्न गाउँपालिकामा हेल्प डेस्कको निर्माण, जनचेतना जगाउने, देशभर लकडाउनको समय लम्बिदै गर्दा होम क्वारेन्टाइनमा बस्न आग्रह,कसैसँग लसपस नगर्न आग्रह जस्ता कार्य यस गाउँपालिकाले गरेको उहाँले बताउनुभयो। यसका साथै कालोबजारी न्युनिकरणका लागि अनुगमन टोली खटाइएको छ।
दिनभर काम गरि जीवन निर्वाह गर्ने गरिब तथा विपन्न परिवारका लागि मदाने गाउपालिकाले राहत कोषको पनि स्थापना गरेको छ। गरिब तथा विपन्न घरपरिवारलाई राहातका अत्यावश्यक सामान चैत २५ भित्र वितरण गर्ने बताइएको छ। कोरोनाको संभावित जोखिमलाई निर्मुल पार्नको लागि नेपाल प्रहरी सँग पनि समन्वय गरि प्रत्येक गाउगाउ खटाइएको छ। विभिन्न भेटघाट, मिटिङ्, समारोह, कार्यक्रम जस्ता कार्यमा पनि अनुगमन भैरहेको साथै यस्ता कार्य नभएको गाउँपालिकाले जनाएको छ।
