काठमाडौँ, भदौ ५ – टीकापुर घटनामा जन्मकैदको सजाय पाएका रेशम चौधरीलाई आममाफी दिने सरकारको निर्णयविरुद्ध परेको रिटमा सर्वोच्च अदालतमा सुनुवाइ हुने भएको छ।
सर्वोच्च अदालतले न्यायाधीशद्वय हरिप्रसाद फुयाँल र नृपध्वज निरौलाको संयुक्त इजलासमा उक्त मुद्दाको पेसी तोकेको छ। करिब साढे दुई वर्षदेखि सुनुवाइको प्रतीक्षामा रहेको रिटलाई अग्राधिकार दिँदै सुनुवाइका लागि पेसी तोकिएको हो।
टीकापुर घटनामा मारिएका प्रहरी निरीक्षककी श्रीमतीले २०८० जेठ १६ गते चौधरीलाई आममाफी दिने तत्कालीन सरकारको निर्णय बदर गर्न माग गर्दै सर्वोच्चमा रिट दायर गरेकी थिइन्।
टीकापुर घटनासम्बन्धी मुद्दामा तीन तहका अदालतबाट दोषी ठहर भएका चौधरीलाई जन्मकैदको सजाय सुनाइएको थियो। तर तत्कालीन सरकारले उनलाई आममाफी दिएपछि उक्त निर्णयविरुद्ध सर्वोच्चमा कानुनी चुनौती परेको थियो।
लामो समयदेखि विचाराधीन रहेको रिटमा अब सुनुवाइ अघि बढ्ने भएपछि चौधरीलाई आममाफी दिने सरकारको निर्णयको संवैधानिक तथा कानुनी वैधतामाथि सर्वोच्च अदालतमा बहस हुने भएको छ।
