काठमाडौं, भदौ ३ – सुनसरी र सिरहामा भएका झडप तथा गोलीकाण्डबारे छानबिन गर्न गठित समितिहरूले घटनामा बाहिरी व्यक्तिको घुसपैठ नभएको निष्कर्ष निकालेका छन्। समितिका अनुसार दुवै स्थानमा सुरक्षाकर्मीले चलाएको गोली लागेर चार युवाको मृत्यु भएको हो।
सुनसरीको देवानगञ्ज–३, कप्तानगञ्जमा साउन १० गते भएको झडपका क्रममा नेपाल प्रहरी र सशस्त्र प्रहरी दुवैबाट गोली चलेको पाइएको छ। छानबिनका क्रममा दुवै सुरक्षा निकायले गरी २० राउन्ड गोली चलाएको खुलेको समितिका एक सदस्यले बताएका छन्।
कप्तानगञ्जमा विवाद बढेपछि प्रहरीले स्थिति नियन्त्रणमा लिन बल प्रयोग गरेको थियो। पछि सशस्त्र प्रहरीसमेत घटनास्थलमा पुगेको थियो। गोली लागेर स्थानीय ओमप्रकाश मेहताको घटनास्थलमै मृत्यु भएको थियो भने घाइते जयप्रकाश मेहता र रवीन्द्र मेहताको उपचारका क्रममा मृत्यु भएको समितिले जनाएको छ।
यता सिरहाको घटनामा पनि प्रहरीको पेस्तोलबाट चलेको गोली लागेर गणेश यादवको मृत्यु भएको निष्कर्ष निकालिएको छ। घटनास्थलमा नौ राउन्ड गोली चलेको पाइएकोमा सात राउन्ड डमी र दुई राउन्ड पेस्तोलबाट चलेको प्रतिवेदनमा उल्लेख छ। पेस्तोलबाट चलेको अर्को गोली लागेर एक व्यक्ति घाइते भएका थिए।
घटनाका क्रममा प्रहरी जवानलाई समेत गोली लागेको दाबी गरिएको भए पनि छानबिनले त्यसको पुष्टि गर्न नसकेको जनाएको छ। समितिका अनुसार चिकित्सकीय परीक्षणबाट गोली लागेको प्रमाण भेटिएन, यद्यपि छर्रा लागेको हुनसक्ने सम्भावना देखिएको छ।
छानबिन समितिहरूले गोली चलाउने सुरक्षा अधिकारीमाथि आवश्यक कारबाही गर्न सरकारलाई सिफारिस गरेका छन्। साथै घटनाका बेला जिल्ला प्रहरी नेतृत्व, फिल्डमा खटिएका कमान्डर र प्रमुख जिल्ला अधिकारीको भूमिकासमेत प्रतिवेदनमा समेटिएको बताइएको छ।
भविष्यमा भिड नियन्त्रणका क्रममा मानवीय क्षति कम गर्न समितिले गैरघातक हतियार तथा रबरका गोली प्रयोग गर्न सुझाव दिएको छ। हतियार बोकेर भिड नियन्त्रणमा जाने सुरक्षाकर्मीलाई बडीवर्न क्यामेरा अनिवार्य गर्न, घटनाको भिडियो तथा फोटो सुरक्षित राख्न र सुरक्षा निकायलाई थप तालिम तथा आवश्यक स्रोतसाधन उपलब्ध गराउन पनि समितिले सिफारिस गरेको छ।
