काठमाडौं, भदौ २ – पैदलयात्रीलाई पछ्याउँदै सुनको सिक्री लुट्ने र चोरीको सुन बिक्री गर्ने समूहका चार जनालाई प्रहरीले पक्राउ गरेको छ। काठमाडौं उपत्यकाका विभिन्न स्थानमा महिला तथा ज्येष्ठ नागरिकलाई लक्षित गरी सिक्री लुटपाट हुँदै आएको सूचनाका आधारमा प्रहरीले अनुसन्धान अघि बढाएको थियो।
काठमाडौं उपत्यका अपराध अनुसन्धान कार्यालयको टोलीले साउन ३१ गते विभिन्न स्थानबाट उनीहरूलाई पक्राउ गरेको हो। अनुसन्धानका क्रममा पक्राउ परेकामध्ये केहीले मोटरसाइकल प्रयोग गरी पीडितको नजिक पुग्ने र अर्का व्यक्तिले घाँटीमा लगाएको सिक्री तानेर भाग्ने गरेको खुलेको प्रहरीले जनाएको छ।
पक्राउ पर्नेमा भोजपुरको रामप्रसाद राई गाउँपालिका–२ घर भई काठमाडौंको कोटेश्वर बस्ने ३२ वर्षीय योगेन्द्र तामाङ र रामेछापको दोरम्बा गाउँपालिका–२ ढोईगाउँ घर भई पेप्सीकोला बस्ने ३६ वर्षीय काले भनिने देवेन्द्र थापा मगर छन्।
त्यस्तै, चोरी भएको सुन खरिद गरेको आरोपमा भोजपुरको रामप्रसाद राई गाउँपालिका–६ मालबासे घर भई हाल नरदेवी बस्ने ४० वर्षीय मिलन बि.क. र भारतको पश्चिम बंगाल, कलकत्ता घर भई हाल भेडासिंह बस्ने ४० वर्षीय सञ्जित सामन्त पक्राउ परेका छन्।
प्रहरीका अनुसार गत साउन २६ गते भक्तपुरको मध्यपुर थिमी–१ लोकन्थलीस्थित बिग मार्ट नजिक र साउन ३० गते लोकन्थली हनुमान चोकमा मोटरसाइकलमा आएका व्यक्तिले एक्लै हिँडिरहेका महिला तथा ज्येष्ठ नागरिकको घाँटीबाट सुनको सिक्री तानेर फरार भएका थिए।
अनुसन्धान थप अघि बढाउँदा यही समूहले काठमाडौं उपत्यकाबाहेक सुनसरीमा समेत सिक्री लुटेको खुलेको छ। साउन २२ गते धरान–१५ पाथीभरा लाइनबाट करिब २.५ तोला र साउन ३१ गते इटहरी–२० तरहराबाट करिब ३ तोला सुनको सिक्री लुटिएको घटनामा उनीहरूको संलग्नता देखिएको प्रहरीले जनाएको छ।
पक्राउ परेकाहरूलाई थप अनुसन्धान तथा कानुनी कारबाहीका लागि प्रहरी वृत्त ललितपुर पठाइएको छ। प्रहरीले सार्वजनिक स्थानमा हिँड्दा सुनका गरगहना प्रदर्शन नगर्न तथा अपरिचित मोटरसाइकल वा व्यक्तिको गतिविधिप्रति सचेत रहन आग्रह गरेको छ।
