रोल्पा, साउन ३० – रोल्पाको पूर्वी क्षेत्रमा लगातार परेको वर्षापछि गएको पहिरोले ठूलो जनधनको क्षति गरेको छ। बुधबार र बिहीबार मात्रै थबाङ र सुनछहरी गाउँपालिकाका विभिन्न स्थानमा पहिरोमा परी १५ जनाको मृत्यु भएको छ। दुई जना बेपत्ता छन् भने दुई जना घाइतेको उपचार भइरहेको छ।
सबैभन्दा ठूलो क्षति थबाङ गाउँपालिका–५ कोटलबारामा भएको छ। बुधबार आएको पहिरोले बस्ती नै बगाउँदा ११ जनाले ज्यान गुमाएका छन्। पहिरोमा परेका ९ वर्षीय अशिम पुनमगर र ८० वर्षीय अजम्बर पुनमगर अझै सम्पर्कविहीन छन्। उनीहरूको खोजी कार्य जारी छ।
उक्त घटनामा २२ वर्षीय हिमाल पुनमगर र २५ वर्षीय सञ्जय घर्तीमगर घाइते भएका छन्। दुवैलाई उद्धार गरी उपचारका लागि बुटवलस्थित प्रादेशिक अस्पताल पुर्याइएको छ। पहिरोले थबाङमा नौवटा घर, एउटा घुम्ती पसल, दुई गोठ र एउटा चर्चसहित १३ वटा संरचना बगाएको छ।
घटनापछि थबाङ गाउँपालिकाका स्थानीयमा गहिरो शोक छाएको छ। गाउँपालिका अध्यक्ष ऋषिकेशव बुढामगरले ठूलो मानवीय र भौतिक क्षति भएको भन्दै घटनाले आफूहरूलाई स्तब्ध बनाएको बताएका छन्। उनले मृतकप्रति श्रद्धाञ्जली र घाइतेको शीघ्र स्वास्थ्यलाभको कामना गरेका छन्।
यसैबीच, सुनछहरी गाउँपालिका–२ फलबाङ र गिट्ठेमा पनि पहिरोले चार जनाको ज्यान लिएको छ। फलबाङमा ७७ वर्षीय वीरबहादुर घर्तीमगर, ६८ वर्षीया शनी घर्तीमगर र ७० वर्षीया लली घर्तीमगर तथा गिट्ठेमा ६४ वर्षीय लामी घर्तीमगरको मृत्यु भएको हो।
थबाङको पहिरोमा उद्धार तथा खोजी कार्यमा खटिएका सुनछहरी गाउँपालिकाका अध्यक्ष धनबहादुर पुनमगरले आफ्नै पालिकामा पनि पहिरोबाट जनधनको क्षति भएपछि दुःख व्यक्त गरेका छन्। प्राकृतिक विपत्तिले क्षणभरमै ठूलो क्षति पुर्याएको भन्दै उनले मृतक परिवारप्रति समवेदना व्यक्त गरेका छन्।
लगातारको वर्षाका कारण रोल्पाका पहाडी क्षेत्रमा पहिरोको जोखिम अझै कायम रहेको छ। दुई दिनमै १५ जनाको मृत्यु र दुई जना बेपत्ता भएपछि स्थानीय तह तथा सुरक्षा निकायले उद्धार र खोजी कार्यलाई प्राथमिकता दिएका छन्। घटनाप्रति प्रधानमन्त्री तथा मन्त्रिपरिषद्को कार्यालयले समेत दुःख व्यक्त गरेको छ।
