सिराहा, साउन २९ – कर्तव्य ज्यान मुद्दामा दोषी ठहर भएर चार दशकभन्दा बढी समयदेखि फरार रहेका एक वृद्धलाई प्रहरीले पक्राउ गरेको छ। ८० वर्षीय ठकाई यादवलाई आफ्नै गाउँको शिवमन्दिरमा पुजारीको भेषमा लुकेर बसिरहेको अवस्थामा प्रहरीले नियन्त्रणमा लिएको हो।
लक्ष्मीपुर पतारी गाउँपालिका–५ खरुक्याहीका यादव २०४१ साल वैशाख १ गते भएको हत्याको घटनामा संलग्न रहेको प्रहरीको भनाइ छ। वैशाखे मेलाका क्रममा मन्दिरमा बोका चढाउने विषयमा विवाद उत्पन्न भएपछि रजिन्द्र यादवमाथि आक्रमण भएको थियो।
प्रहरीका अनुसार उक्त घटनामा यादवसहित ११ जना सहभागी थिए। उनीहरूले रजिन्द्रलाई घेरा हालेर कुटपिट गरेपछि उनको मृत्यु भएको थियो। घटनापछि उनीहरूमाथि कर्तव्य ज्यान मुद्दा दर्ता गरिएको थियो।
उक्त मुद्दामा उच्च अदालतले ठकाई यादवलाई एक वर्ष कैद सजाय सुनाएको थियो। अदालतबाट सजाय तोकिएपछि उनी पक्राउ नपरी फरार रहँदै आएका थिए।
लामो समयसम्म पहिचान लुकाएर बसेका यादवले पछिल्लो समय गाउँकै शिवमन्दिरमा पुजारीको भूमिका निर्वाह गर्दै आएको खुलेको प्रहरीले जनाएको छ। यही क्रममा प्रहरीले उनलाई बिहीबार पक्राउ गरेको हो।
पक्राउ गरिएका यादवलाई जिल्ला अदालत सिराहामा उपस्थित गराइएको छ। प्रहरीका अनुसार सोही घटनामा संलग्न अन्य फरार प्रतिवादीहरू भने यसअघि नै मृत्यु भइसकेका छन्।
