काठमाडौं, साउन २६ – डा. धवलशमशेर राणाको नेतृत्वमा गठन भएको जय नेपाल पार्टीले निर्वाचन आयोगमा दल दर्ता गर्ने पूर्वनिर्धारित कार्यक्रम पछि सारेको छ। यसअघि साउन २८ गते दर्ता गर्ने तयारी भए पनि पार्टीको आन्तरिक तयारी पूरा नभएकाले मिति परिवर्तन गरिएको हो।
पार्टीका सर्वोच्च नेता दुर्गा प्रसाईंले नयाँ पार्टी गठनका लागि आवश्यक संगठनात्मक तथा अन्य तयारी अझै जारी रहेकाले दर्ता प्रक्रिया सारिएको बताएका छन्। उनले पार्टीको संरचना र आवश्यक विषयमा आन्तरिक छलफल भइरहेको जानकारी दिएका छन्।
पार्टीभित्र नेतृत्व र अधिकार बाँडफाँटका विषयमा सहमति जुटाउन बाँकी रहेको चर्चा पनि छ। विशेषगरी निर्वाचनमा उम्मेदवारको टिकटमा कसले हस्ताक्षर गर्ने भन्ने विषयमा सभापति राणा र सर्वोच्च नेता प्रसाईंबीच छलफल भएको बताइएको छ।
तर विधान मस्यौदा समितिका संयोजक माधव कल्पितले यसलाई विवादका रूपमा लिन नहुने बताएका छन्। उनका अनुसार सभापति र सर्वोच्च नेता दुवैले उम्मेदवारको टिकटमा हस्ताक्षर गर्ने व्यवस्था मिलाइनेछ।
दल दर्ताको मिति सारिनुको अर्को कारण प्रस्तावित केन्द्रीय सदस्यमध्ये केही काठमाडौं बाहिर रहनु पनि रहेको कल्पितले बताएका छन्। साथै, साउन २८ गतेको दिन उपयुक्त नदेखिएकाले भदौको पहिलो सातामा दल दर्ता गर्ने तयारी गरिएको उनको भनाइ छ।
प्रस्तावित विधानअनुसार पार्टीको केन्द्रीय कमिटी ३१९ सदस्यीय हुनेछ भने आयोगमा दर्ताका बेला १०१ जना केन्द्रीय सदस्यको सूची बुझाइनेछ। सभापति र सर्वोच्च नेतासहित ३१ जना पदाधिकारी रहने तथा केन्द्रीय कमिटीमा राणा र प्रसाईं पक्षबाट ४०–४० प्रतिशत र अन्य पक्षबाट २० प्रतिशत प्रतिनिधित्व गराउने तयारी गरिएको छ।
