विराटनगर, साउन १५ – सुनसरीको देवानगञ्जमा प्रहरीको गोली लागेर ज्यान गुमाएका दुई युवाको शव पोस्टमार्टम सम्पन्न भएपछि शुक्रबार आफन्तले बुझेका छन्। शवलाई अन्तिम संस्कारका लागि सुनसरीको कप्तानगञ्ज लगिएको छ, जहाँ आजै अन्त्येष्टि गरिने तयारी गरिएको छ।
घटनामा आइतबार ओमप्रकाश मेहताको घटनास्थलमै मृत्यु भएको थियो भने घाइते जयप्रकाश मेहताको उपचारका क्रममा बिहीबार निधन भएको थियो। दुवैको शव विराटनगरस्थित कोशी अस्पतालमा पोस्टमार्टम गरिएपछि परिवारलाई जिम्मा लगाइएको हो।
यसअघि शव विराटनगरको न्यूरो अस्पतालमा राखिएको थियो। पोस्टमार्टमका लागि त्यहाँबाट कोशी अस्पताल ल्याइएको थियो। शुक्रबार बिहान सरकार र पीडित पक्षबीच सात बुँदे सहमति भएपछि आफन्त शव बुझ्न तयार भएका थिए।
सम्झौतापछि शवलाई गाडीमार्फत शवयात्रा गर्दै कप्तानगञ्ज लगिएको छ। स्थानीय र आफन्तको उपस्थितिमा आजै अन्तिम संस्कार गरिने जनाइएको छ।
सरकार र पीडित परिवारबीच भएको सहमतिमा मृतकका परिवारलाई राहत उपलब्ध गराउने, दुवैलाई सहिद घोषणा गर्ने प्रक्रिया अघि बढाउने, घटनाको निष्पक्ष छानबिन गर्ने तथा दोषीमाथि कानुनी कारबाही सुनिश्चित गर्ने लगायतका विषय समेटिएका छन्।
