सिरहा, साउन ११ – सुनसरीको देवानगञ्जमा प्रहरीको गोली लागेर एक युवकको मृत्यु भएको घटनाको विरोधमा सिरहाको गोलबजारमा पनि प्रदर्शन भएको छ। आन्दोलनकारीहरूले घटनाको निष्पक्ष छानबिन, दोषीमाथि कडा कारबाही तथा गृहमन्त्रीको राजीनामाको माग गर्दै प्रदर्शन गरेका हुन्।
प्रदर्शनका क्रममा सहभागीहरूले ‘मृतकलाई न्याय दे’, ‘गोली चलाउनेमाथि कारबाही गर’, ‘प्रहरी दमन बन्द गर’ लगायतका नाराबाजी गरेका थिए। उनीहरूले प्रहरीबाट गोली नचलाइएको दाबी गरिए गोली कसले चलायो भन्ने सत्यतथ्य सार्वजनिक गर्न सरकारसँग माग गरेका छन्। साथै, भोलिसम्म ठोस निर्णय नभए देशव्यापी आन्दोलनको घोषणा गर्ने चेतावनीसमेत दिएका छन्।
यसैबीच, सिरहाका प्रमुख जिल्ला अधिकारी सुरेन्द्र पौडेलले सुनसरी घटनाको विरोधमा गोलबजार र कर्जन्हामा प्रदर्शन भएको जानकारी आएको बताए। प्रदर्शनकारीका प्रतिनिधिसँग संवादको तयारी भइरहेको उल्लेख गर्दै उनले हालसम्म जिल्लाको अवस्था सामान्य रहेको र कुनै अप्रिय घटना नभएको जानकारी दिए। आवश्यकता परे सुरक्षा निकाय तथा सरोकारवालासँग समन्वय गरी थप निर्णय गरिने उनको भनाइ छ।
यसअघि दिउँसो करिब २ बजेतिर कर्जन्हा नगरपालिका–बन्दीपुर क्षेत्रमा आन्दोलनकारीहरूले टायर बालेर पूर्व–पश्चिम राजमार्ग केहीबेर अवरुद्ध गरेका थिए। पछि सडक पुनः सञ्चालनमा आएको थियो।
सुनसरीको देवानगञ्ज–३, कप्तानगञ्जमा साउने सोमबारको बोलबम यात्राका क्रममा डिजे बजाउँदै सप्तकोशी नदीतर्फ गइरहेका दुई समूहबीच विवाद भएपछि झडप भएको थियो। अवस्था नियन्त्रणमा लिन प्रहरीले अश्रुग्यास र हवाई फायर गरेको तथा स्थिति थप तनावग्रस्त बनेपछि गोली चलाउनुपरेको जनाएको छ।
उक्त घटनामा देवानगञ्ज–३ का २४ वर्षीय ओमप्रकाश मेहता प्रहरीको गोलीबाट घाइते भएका थिए। उपचारका क्रममा विराटनगरस्थित न्युरो अस्पतालमा उनको मृत्यु भएको प्रहरीले जनाएको छ।
