जनकपुर, साउन ६ – श्रम संस्कृति पार्टीका अध्यक्ष हर्क साम्पाङले आफ्ना पार्टीका सांसद आरेन राईको विगतको विवादित अभिव्यक्तिलाई लिएर भइरहेको आलोचनाप्रति प्रतिक्रिया दिएका छन्। उनले राईले युवावस्थामा फरक राजनीतिक वातावरण र विचारधाराको प्रभावमा रहेर त्यस्ता अभिव्यक्ति दिएको हुन सक्ने भन्दै अहिले उनलाई परिवर्तन र सुधारको अवसर दिनुपर्ने बताएका छन्।
पार्टी प्रवेश कार्यक्रमका लागि जनकपुरधाम पुगेका साम्पाङले सम्बोधनका क्रममा आरेन राईको प्रसंग उठाउँदै विगतका अभिव्यक्तिका आधारमा अहिलेको मूल्यांकन गर्नु उचित नहुने धारणा राखे। उनका अनुसार मानिसको विचार, व्यवहार र दृष्टिकोण समयसँगै बदलिन सक्छ, त्यसैले परिवर्तनलाई स्वीकार गर्ने संस्कार समाजमा हुन आवश्यक छ।
साम्पाङले आरेन राई श्रम संस्कृति पार्टीमा आउनुअघि अर्को राजनीतिक संगठनमा सक्रिय रहेको स्मरण गराउँदै त्यतिबेलाको राजनीतिक ‘स्कुलिङ’ र संगतले उनको सोचमा प्रभाव पारेको हुन सक्ने बताए। अहिले भने उनी फरक राजनीतिक यात्रामा रहेको र पार्टीको नीति तथा मूल्यअनुसार अघि बढिरहेको साम्पाङको दाबी छ।
उनले मानिसको व्यवहारमा संगत र वातावरणको ठूलो प्रभाव पर्ने उल्लेख गर्दै, “जसको संगतमा बसिन्छ, त्यसैअनुसार सोच र व्यवहार विकास हुन्छ,” भन्ने धारणा व्यक्त गरे। अहिले आरेन राईले आफ्नो विगतको अभिव्यक्तिप्रति संसद्मै माफी मागिसकेको उल्लेख गर्दै त्यसलाई निरन्तर राजनीतिक मुद्दा बनाइरहनु उचित नहुने उनले बताए।
जनकपुर भ्रमणका क्रममा जानकी मन्दिर प्रवेश गर्न खोज्दा केही युवाले विरोध गरेको घटनापछि साम्पाङले यो विषयमा थप प्रष्टिकरण दिएका हुन्। विरोधकर्ताले आरेन राईको पुरानो ‘गाई काटेर खान पाउनुपर्छ’ भन्ने अभिव्यक्तिलाई आधार बनाएर साम्पाङको टोलीलाई मन्दिर प्रवेशमा अवरोध गरेका थिए।
साम्पाङले समाजले गल्ती स्वीकार गरी परिवर्तनको बाटो रोजेका व्यक्तिलाई अघि बढ्न दिने वातावरण बनाउनुपर्नेमा जोड दिए। विगतका अभिव्यक्तिका कारण सम्पूर्ण श्रम संस्कृति पार्टीलाई दोष दिनु न्यायोचित नहुने भन्दै उनले आरेन राई अहिले पार्टीको नीति र विचारअनुसार जिम्मेवार ढंगले अघि बढिरहेको दाबी गरे।
