धितोपत्र बजार सुधारको रोडम्याप तयार हुँदै, प्रधानमन्त्रीले भने- जायज माग सम्बोधन हुन्छ

काठमाडौं, साउन ४ – प्रधानमन्त्री बालेन्द्र शाहले पुँजी बजार र धितोपत्र व्यवसायमा देखिएका समस्या समाधान गर्दै बजारलाई थप व्यवस्थित र विश्वासयोग्य बनाउने प्रतिबद्धता व्यक्त गरेका छन्। यसका लागि सरोकारवाला निकायसँग समन्वय गरी व्यवसायी तथा लगानीकर्ताका जायज माग कार्यान्वयनमा लैजाने उनले बताएका छन्।

सोमबार सिंहदरबारमा आयोजित छलफलमा प्रधानमन्त्री शाहले पुँजी बजारसँग सम्बन्धित समस्याको समाधानका लागि नयाँ समिति गठनभन्दा पनि सम्बन्धित निकायले तत्काल जिम्मेवारीपूर्वक काम अघि बढाउनुपर्नेमा जोड दिए। उनले आवश्यक निर्णय र सुधारका कामलाई छिटो अघि बढाउन सरकार तयार रहेको स्पष्ट पारे।

छलफलमा सहभागी पुँजी बजारका प्रतिनिधिहरूले लगानीकर्ताको मनोबल बढाउने, बजारमा माग र आपूर्तिबीच सन्तुलन कायम गर्ने तथा कर प्रणालीमा रहेको अस्पष्टता हटाउन सरकारको ध्यानाकर्षण गराएका थिए। उनीहरूले घाटा समायोजनपछि मात्र कर लगाउने व्यवस्था लागू गर्नुपर्ने र ब्रोकरमार्फत मार्जिन लेन्डिङ सञ्चालन गर्न आवश्यक कानुनी व्यवस्था गर्न सुझाव दिएका छन्।

यस्तै, नेपाल स्टक एक्सचेन्जलाई प्रविधिमैत्री र प्रतिस्पर्धी बनाउने, दक्ष जनशक्ति आकर्षित गर्ने वातावरण सिर्जना गर्ने तथा धितोपत्र बोर्डले १० कित्ते नीतिको पुनरावलोकन गरी योग्य संस्थागत लगानीकर्तामार्फत बुक बिल्डिङ प्रणालीबाट आईपीओ निष्कासन गर्ने व्यवस्था गर्नुपर्ने सुझाव पनि छलफलमा प्रस्तुत गरिएको थियो।

बैठकमा धितोपत्र बोर्ड, नेपाल स्टक एक्सचेन्ज, स्टक ब्रोकर एसोसिएसन अफ नेपाल तथा निजी क्षेत्रका प्रतिनिधिहरूको सहभागिता रहेको थियो। सरकारले पुँजी बजार सुधारका लागि सरोकारवालासँगको सहकार्यलाई थप प्रभावकारी बनाउने संकेत दिएको छ।