काठमाडौं, असार ३० – पूर्वाधार विकास मन्त्री सुनिल लम्सालले ट्राफिक नियम उल्लंघन गर्ने चालकलाई एकैपटक ५० हजार रुपैयाँ जरिवाना गरिने व्यवस्था नरहेको स्पष्ट पारेका छन्। प्रतिनिधिसभामा मंगलबार उनले सामाजिक सञ्जालमा फैलिएको भ्रमको खण्डन गर्दै वास्तविक कानुनी व्यवस्था जानकारी गराए।
उनका अनुसार ट्राफिक नियम उल्लंघन गर्दा सामान्य अवस्थामा ५०० रुपैयाँ जरिवाना लाग्छ। एउटै कसुर पटक–पटक दोहोरिएमा मात्रै जरिवाना क्रमशः बढ्दै अधिकतम ५० हजार रुपैयाँसम्म पुग्ने कानुनी व्यवस्था रहेको उनले बताए।
मन्त्री लम्सालले गणेश नेपालीको आत्मदाहलाई ट्राफिक जरिवानासँग जोडिएको प्रचार पनि निराधार रहेको बताए। उनले गणेश नेपालीलाई १० हजार रुपैयाँ जरिवाना गरिएको भन्ने दाबी गलत भएको उल्लेख गरे।
उनले पछिल्लो पाँच वर्षमा देशभर १ लाख २५ हजार ५६४ सडक दुर्घटना हुँदा १२ हजार ४५२ जनाले ज्यान गुमाएको तथ्याङ्क प्रस्तुत गर्दै सडक सुरक्षालाई प्रभावकारी बनाउन सडक स्तरोन्नति र सुधारका कार्यक्रमलाई सरकारले प्राथमिकता दिएको बताए।
