काठमाडौं, असार २९ – नेपाली कांग्रेसका सभापति गगन थापाको रातोपुलस्थित निवास अगाडि सोमबार बिहानदेखि एउटा गाडी शंकास्पद अवस्थामा पार्किङ गरिएको फेला परेको छ।
स्थानीय बासिन्दाका अनुसार बीएसी ९५७५ नम्बरको गाडी बिहान करिब ७ बजेदेखि निवासअगाडि राखिएको थियो। गाडी यसरी पार्किङ गरिएको थियो कि त्यहाँबाट मोटरसाइकलसमेत सहज रूपमा आवतजावत गर्न कठिन भएको उनीहरूको भनाइ छ।
प्रत्यक्षदर्शीले गाडी पार्किङ गरेपछि चालक नेपाल प्रहरीको सवारीसाधनमा चढेर त्यहाँबाट गएको दाबी गरेका छन्। तर, उक्त दाबीबारे नेपाल प्रहरीले हालसम्म कुनै आधिकारिक पुष्टि वा प्रतिक्रिया दिएको छैन।
सोमबार नै अनलाइनखबर, हिमालय टेलिभिजन र कान्तिपुर पब्लिकेसन्सका कार्यालयबाहिर पनि यस्तै प्रकारका गाडी शंकास्पद रूपमा पार्किङ गरिएका थिए। ती गाडीहरूलाई प्रहरीले क्रेनमार्फत हटाएर आवश्यक अनुसन्धान सुरु गरेको जनाएको छ।
एकै दिन विभिन्न संवेदनशील स्थानमा यस्ता घटना दोहोरिएपछि सुरक्षा निकायले घटनाको प्रकृति र उद्देश्यबारे अनुसन्धानलाई तीव्र बनाएको छ।
