काठमाडौं, असार २० – दैलेखस्थित कर्णाली नदीमा खसेर बेपत्ता भएको यात्रुवाहक गाडी र यात्रुको खोजीलाई थप प्रभावकारी बनाउन सशस्त्र प्रहरी बल नेपालले विशेष उपकरणसहितको गोताखोर टोली परिचालन गरेको छ।
विपद् व्यवस्थापन तालिम शिक्षालय, कुरिनटारबाट सशस्त्र प्रहरी निरीक्षक प्रेमबहादुर तामाङको नेतृत्वमा चार सदस्यीय टोली घटनास्थल पठाइएको हो। टोलीले शनिबारदेखि सोनार क्यामरा, म्याग्नेटलगायत आधुनिक उपकरणको प्रयोग गर्दै नदीको गहिराइमा खोजी अभियान सञ्चालन गर्नेछ।
सुर्खेतबाट कालीकोटतर्फ जाँदै गरेको कर्णाली प्रदेश ०२–००१ ख १०५५ नम्बरको फोर्स गाडी गत बिहीबार सडकबाट करिब ६–७ सय मिटर तल कर्णाली नदीमा खसेको थियो। दुर्घटनापछि तत्कालै सशस्त्र प्रहरीका विभिन्न इकाइबाट गोताखोरसहितको उद्धार टोली परिचालन गरिएको थियो।
खोजीका क्रममा दुर्घटनास्थलबाट केही तल एक पुरुषको शव फेला परेको भए पनि गाडी र अन्य यात्रुको अवस्था अझै अज्ञात छ। त्यसैले विशेष प्रविधिको सहायताले खोजी अभियानलाई तीव्र बनाइएको सशस्त्र प्रहरीले जनाएको छ।
