सुर्खेत, असार १९ – दैलेखको साङ्गेतडामा कर्णाली नदीमा खसेको यात्रुबाहक फोर्स गाडी दुर्घटना भएको २४ घण्टाभन्दा बढी समय बितिसक्दा पनि गाडी फेला पर्न सकेको छैन। गाडीमा कति जना यात्रु सवार थिए भन्ने विषयमा समेत प्रशासनसँग स्पष्ट विवरण छैन।
कर्णाली राजमार्गअन्तर्गत चामुण्डा बिन्द्रासैनी नगरपालिका–७ साङ्गेतडामा बिहीबार बिहान क.प्र. ०२–००१ ख १०५५ नम्बरको फोर्स गाडी करिब ४ सय मिटर तल कर्णाली नदीमा खसेको थियो।
जिल्ला प्रहरी कार्यालय दैलेखका अनुसार प्रारम्भिक अनुमानमा गाडीमा ५ देखि ६ जना यात्रु रहेको हुन सक्ने देखिए पनि वास्तविक संख्या यकिन भइसकेको छैन। सुर्खेतदेखि घटनास्थलसम्म रहेका चेकपोस्टहरूबाट समेत यात्रुको विवरण संकलन गर्ने प्रयास भइरहेको प्रहरीले जनाएको छ।
दुर्घटनालगत्तै नेपाल प्रहरी, सशस्त्र प्रहरी र गोताखोरसहित ५० भन्दा बढी सुरक्षाकर्मी खोज तथा उद्धारमा खटिएका छन्। तर वर्षासँगै नदीको बहाव बढ्नु, पानी धमिलो हुनु र दुर्घटनास्थल अत्यन्तै भिरालो भएकाले खोजी कार्यमा ठूलो कठिनाइ भइरहेको छ।
कर्णाली प्रदेश प्रहरी प्रमुख डीआईजी जयराज सापकोटाका अनुसार हालसम्म गाडीका केही सिट र केही मोबाइल फोन मात्र फेला परेका छन् भने नदीमा डुबेको गाडी अझै भेटिएको छैन।
दुर्घटनास्थल नजिकै भीरमा अड्किएको अवस्थामा एक जनाको शव फेला परेको छ। उनको पहिचान कालिकोटको पचालझरना गाउँपालिका–९ का ५४ वर्षीय जेखे तिरुवाका रूपमा भएको प्रहरीले जनाएको छ।
प्रहरीका अनुसार बुलबुले यातायात प्रालिको उक्त गाडी अनियन्त्रित भएर कर्णाली नदीमा खसेको प्रारम्भिक अनुमान गरिएको छ। दुर्घटनाको वास्तविक कारण भने अनुसन्धानपछि मात्रै खुल्ने जनाइएको छ।
