काठमाडौं, असार १९ – पोर्चुगलका कप्तान क्रिस्टियानो रोनाल्डोले फिफा विश्वकप २०२६ सम्पन्न भएपछि अन्तर्राष्ट्रिय फुटबलबाट सन्यास लिने सम्भावना बलियो बनेको छ। यो जानकारी रोनाल्डोकी दिदी कातिया अभेइरोले सार्वजनिक गरेकी हुन्।
विश्वकपको नकआउट चरणमा क्रोएसियाविरुद्ध पेनाल्टीमार्फत गोल गर्दै पोर्चुगललाई २–१ को जित दिलाउन महत्वपूर्ण भूमिका खेलेका रोनाल्डोबारे बोल्दै कातियाले यो प्रतियोगिता नै उनको अन्तर्राष्ट्रिय करियरको अन्तिम यात्रा हुन सक्ने बताइन्। उनले समर्थकलाई रोनाल्डोसँग बितेका क्षणको भरपुर आनन्द लिन आग्रह गर्दै यो नै उनको “लास्ट डान्स” हुन सक्ने उल्लेख गरिन्।
सन् २००६ को जर्मनी विश्वकपबाट विश्वकप यात्रा सुरु गरेका रोनाल्डोले लगातार छैटौं संस्करण खेल्दै इतिहास रचेका छन्। उनले पोर्चुगलका लागि हालसम्म २४६ अन्तर्राष्ट्रिय खेलमा १४६ गोल गरेका छन् भने समग्र व्यावसायिक करियरमा ९७६ गोल पूरा गर्दै १ हजार गोलको कीर्तिमान नजिक पुगेका छन्।
क्रोएसियाविरुद्धको गोलसँगै उनले विश्वकपमा आफ्नो गोल संख्या ११ पुर्याएका छन्। साथै ४१ वर्ष १४७ दिनको उमेरमा विश्वकपको नकआउट चरणमा गोल गर्ने सबैभन्दा पाका आउटफिल्ड खेलाडीको नयाँ कीर्तिमान पनि कायम गरेका छन्।
