जुम्लामा प्रहरीको यातनाबाट १३ वर्षीय किशोरको मृत्यु

जुम्लामा प्रहरीको यातनाबाट गुठीचौर गाउँपालिका–३ गज्याङकोटका १३ वर्षीय बालक पदम बुढाको मृत्यु भएको छ । प्रहरीको यातनाबाट बिरामी परेका बुढाको कर्णाली स्वास्थ्य विज्ञान प्रतिष्ठानमा उपचारका क्रममा मृत्यु भएको हो । मोबाइल चोरेको आरोपमा गत १८ माघमा प्रहरीले पदमलाई जिल्ला प्रहरी कार्यालय जुम्लाको हिरासतमा राखिएको थियो ।

प्रहरी कार्यालयबाट घर फर्किएपछि पदमको खुट्टा र शरीर सुनिनुका साथै निलडाम देखिएको थियो,’ मृतकका दाइ शिव बुढाले भने, ‘ उपचारका लागि कर्णाली स्वास्थ्य विज्ञान प्रतिष्ठानमा लगेका थियौं । तर, शरीरमा गहिरो चोटका कारण मुटु, फोक्सो र मस्तिष्कमा क्रमशः रगत जम्दै गएपछि बुधबार पदमको मृत्यु भयो ।’

किशोरको मृत्यु भएपछि आन्दोलनमा उत्रिएका आफन्त र स्थानीय । किशोरको मृत्यु भएपछि आन्दोलनमा उत्रिएका आफन्त र स्थानीय । अस्पतालको बिरामी कार्डमा पनि पदमको पैतालामा पाइप र लठ्ठीले धेरै हानेकाले शरीर सुन्निएको उल्लेख गरिएको बुढाले जानकारी दिए । ‘प्रहरीको यातनाका कारणले मृत्यु भएपछि हिजो आन्दोलन गरेका थियौं,’ उनले भने, ‘आज (शुक्रबार) त्यस विषयमा प्रशासनमा छलफल भइरहेको छ ।’

घटनाका विषयमा मृतकका आफन्तसँग अहिले छलफल भइरहेको र छानबिन गर्न गृह मन्त्रालयबाट टोली आउन लागेको जुम्लाका प्रमुख जिल्ला अधिकारी भुपेन्द्र थापाले जानकारी दिए । ‘दोषीलाई कारबाही र पीडित परिवारलाई राहतका लागि प्रदेशको कानुन मन्त्रालय र संघको गृह मन्त्रालयमा पहल गर्ने विषयमा छलफल भइरहेको छ,’ उनले भने, ‘आफन्तसँग बसेर त्यस विषयमा छलफल हुँदैछ ।’

गत माघ १८ गते मृतक पदम बुढासहित सात जना युवा गाउँकै एक जनाको विवाहमा गएको त्यहाँ जादा राति एक जनाको मोबाइल हराएको विषयमा प्रहरीले उनीहरुलाई पक्राउ गरेको आफन्तले बताएका छन् । प्रहरीले घटनाबारे अनुसन्धान गर्न प्रहरी जवान कृष्ण अधिकारीलाई निलम्बन गरेको छ ।

मृतकका आफन्तले घटनाका विषयमा निष्पक्ष रुपमा छानबिन र घटना दोषीलाई कारबाही नभएसम्म शव नबुझ्ने बताएका छन् । अहिले शव कर्णाली स्वास्थ्य विज्ञान प्रतिष्ठानमा राखिएको छ । कर्णाली स्वास्थ्य विज्ञान प्रतिष्ठान जुम्लाले बुढाको मृत्यु फोक्सोमा रगतको जम्दा मृत्यु भएको जनाएको छ ।