काठमाडौं-अबदेखि पत्रकारले हुलाक कार्यालय बाटै प्रेस प्रमाण पत्र लिन वा नवीकरण गर्न पाउने भएका छन्।
यसअघि प्रेस प्रतिनिधि प्रमाण पत्र लिन काठमाडौंमा आइपुग्नुपर्ने बाध्यतालाई अन्त्य गर्दै सरकारले सम्बन्धित जिल्लाबाटै प्रेस पास लिन पाउने निर्णय गरेको हो।
सञ्चार तथा सूचना प्रविधि मन्त्रालयले ७७ वटै जिल्लामा रहेका हुलाक कार्यालय र हुलाक निर्देशनालय बाट प्रेस प्रतिनिधि प्रमाण पत्र तथा अनलाइन नवीकरण गर्न सकिने व्यवस्था गरेको हो ।
सञ्चार तथा सूचना प्रविधिमन्त्री पार्वत गुरुङले यसलाई महत्वपूर्ण निर्णय भएको बताए। सूचना विभागमा पत्रकारको लाइने हुने समस्याको अन्त्य हुने उनको विश्वास छ ।
पत्रकारले अब प्रेस प्रतिनिधि प्रमाणपत्र लिन जिल्ला हुलाक कार्यालयमा निवेदन दिनुपर्नेछ ।
हुलाक कार्यालयले आवश्यक कागजपत्र रुजु गरेर केन्द्रमा पठाउनेछ ।
त्यसपछि पत्रकारले त्यहीबाट प्रेस प्रतिनिधि प्रमाणपत्र पाउनेछन् ।
