बुटवल, ११ मंसिर । बुटवल उपमहानगरका लागि पाल्पाको झुम्सा खानेपानी योजनाको शिलन्यास गरिएको छ । बिहिवार अर्थमन्त्री विष्णु पौडेल खानेपानी योजनाको शिलान्यास गर्दै जनताले स्थिरता चाहेको बेला गैरराजनीतिक कुरा उचालेर संकट पैदा गर्नु चिन्ता जनक भएको बताए । उनले नेकपामा बिग्रह भए नेकपा नरहने र त्यसले सिंगो मुलुकलाई नै हानी पुग्ने जिकिर गरे ।
अर्थमन्त्री पौडेलले तिनाउले राज्यसँग केही चिज माग्दा फुटकरमा होइन थोकमा माग्न आग्रह गरे । बुटवमा खानेपानीको संकट भएको जनाउँदै पौडेलले पहिला कमजोरी भएपनि अब विगतको कमजोरीबाट शिक्षा लिएर कामलाई अघि बढाइने प्रतिवद्धता जनाए ।
पौडेलले बुटवलको खानेपानीसँग तिनाउको विकास साट्ने विषय नभएको जिकिर गर्दै तिनाउलाई आफ्नै ढंगले विकास गर्ने वाचा गरे । उनले खानेपानी आयोजनाका लागि बजेट अभाव हुन नदिने प्रतिवद्धता पनि जनाए ।
अर्थमन्त्री पौडेलले सुरुङमार्गको पूर्वाधारका लागि सबै काम पुरा भएको जनाउँदै अब टेण्डरप्रक्रियामा जान लागेको जनाए । उनले सुरुङमार्ग निर्माण र सडकको स्तरोन्नती गरी बुटवल–तानसेनलाई आधा घण्टाको दूरीमा खुम्चाउने दाबी समेत गरे ।