कांग्रेस सभापति देउवासंग सत्ता समीकरणको विषयमा छलफल नभएको अर्थमन्त्री विष्णु पौडेलको दावी

बुटवल । सत्तारुढ नेपाल कम्युनिष्ट पार्टी (नेकपा) का महासचिव एवं अर्थमन्त्री विष्णु पौडेलले प्रमुख विपक्षी दल नेपाली कांग्रेसका सभापति शेरबहादुर देउवासंग सत्ता समीकरणका विषयमा छलफल नभएको दावी गरेका छन् ।
प्रेस संगठन रुपन्देहीले गरेको पत्रकार भेटघाटमा पौडेलले प्रधानमन्त्री केपी शर्मा ओलीसंग सुविधाजनक वहुमत भएकाले प्रमुख विपक्षी दलसंग सत्ता समीकरण बारे कुरा गर्नुपर्ने आवश्यकता नै नभएको दावी गरे ।
नेकपाभित्र विवाद बढिरहेका बेला केही दिनअघि प्रधानमन्त्री ओलीले कांग्रेस सभापति देउवासँग बालुवाटारमा भेट गरेका थिए ।
पत्रकारको प्रश्नमा उनले प्रधानमन्त्री र प्रमुख विपक्षी दलका
नेताबीच छलफल भएन भने चिन्ता र आशंकाको विषय हुनसक्ने तर छलफल र संवाद हुनु खुशीको कुरा भएको जवाफ दिए
नेता देउवासंग कोरोना नियन्त्रण, संवैधानिक अंगहरुमा रिक्त पदाधिकारी नियुक्ति लगायतका विषयमा मात्रै छलफल भएको महासचिव पौडेलले प्रष्टिकरण दिए ।
पार्टीका कार्यकारी अध्यक्ष प्रचण्डतर्फ इंगित गर्दै उनले सचिवालय वैठकमा पेश भएको राजनीतिक दस्तावेजले मर्यादाको सीमा नाघेको टिप्पणी गरे ।