गुल्मी,०३ मंसिर ।गुल्मी जिल्लामा पहिलोपटक मोटरबाटो ल्याउने विकासप्रेमी नेता बैकुण्ठबहादुर चन्दको निधन भएको छ । पूर्व राष्ट्रिय पञ्चायत सदस्य (सांसद) तथा जिल्ला पञ्चायतका सभापति समेत भइसकेका चन्दको ८७ वर्षको उमेरमा ललितपुरको निदान अस्पत्तालमा निधन भएको हो ।
जिल्लाको मदाने गाउँपालिका–१ अग्लुङ्ग घर भएका चन्द जिल्लाको विकासका निम्ति निस्वार्थ रुपमा अहोरात्र खटिने नेता चन्द मृगौला सम्बन्धि बिमारको उपचार गराइरहनु भएको थियो ।
विभिन्न किसीमका धम्की र प्रलोभन आउँदा पनि कुनै वास्ता नगरी चन्दले तानसेन देखि तम्घास सम्मको सडक निर्माण गराएक थिए । त्यसअघि गुल्मेलीले नुन, तेल लगायतका अत्यावस्यक सामान बटौली तथा पत्थरकोट बाट बोकेरै ल्याउनुपर्ने बाध्यता थियो ।
चन्दले अगुवाइ गरेर सडक निर्माण गर्ने अभियान चलाएपछि गुल्मेली जनताहरु सातु, मकै र अन्य खाद्यान्न बोकेर पाल्पासम्म बाटो खन्न गएका थिए ।
त्यसपछि मात्रै पहिलोपटक मोटरबाटोको सुविधा पाएका गुल्मीका जनताले चन्दलाई सबैभन्दा विकासप्रेमी नेताको रुपमा लिने गरेका छन् ।
अहिलेम्म पनि उक्त सडक नै गुल्मीलाई अन्य जिल्ला सँग जोड्ने मूख्य सडक हो । गुल्मीलाई बाहिरी जिल्लासँग जोड्ने उक्त सडकको विकल्पमा सडक अहिलेसम्म पनि बन्न सकेको छैन ।
नेता चन्दको निधनपछि गुल्मेलीहरूले सामाजिक संजाल मार्फत जिल्लामा पूर्वाधार विकासका सुत्रधार र विकासप्रेमी नेताको निधनले गुल्मी जिल्लालाई नै क्षति पुगेको धारणा व्यक्त गरिरहेका छन्।
चन्द २०२५ सालदेखि ३८ सालसम्म जिल्ला पञ्चायतको सभापति र २०३८ सालदेखि २०४६ साल सम्म राष्ट्रिय पञ्चायतको सदस्य रहेका थिए।
