गुल्मी, २८ कार्तिक :-
गुल्मीमा विभिन्न सभा, समारोह, जमघट तथा देउसीभैलो खेल्न नपाउने भन्दै जिल्ला प्रशासन कार्यालयले सुचना जारी गरेको छ । विश्वव्यापी फैलिएको कोरोना भाइरसको संभावित संक्रमण न्युनिकरणका लागि चाडपर्वको समयमा यस्तो निर्णय गरिएको हो।
हाल जिल्लाभर कोभिड १९ संक्रमण दर बढ्दै गइरहेको र सक्रिय संक्रमितको संख्या ६५ पुगिरहेको अवस्थालाई मध्येनजर गर्दै चाडपर्वको समयमा बढ्ने सम्भावित जोखिमलाई न्युनिकरण गर्न प्रशासन कार्यालयले यस्तो निर्णय गरेको बताएको छ ।
मठमन्दिर, गुम्बा, चर्च, मस्जित जस्ता धार्मिक स्थलहरुमा नित्यपुजा बाहेकका अन्य भजन कृतन जस्ता गतिबिधि नगर्न र अन्य जमघट अुने खालका काम, विभिन्न संघसंस्थाका सभा,समारोह कार्यक्रम,जात्रा मेला जस्ता क्रियाकलाप नगर्न आग्रह गरेको छ । त्यसैगरी तिहारको समयमा समुहमा जम्मा भई खेलिने देउसी भैलो कार्यक्रम तथा विभिन्न पटका, झिरझिरे जस्ता विस्पोटकजन्य सामाग्री ओसारपसार र समुहगत रमाइलोमा पनि प्रतिबन्ध लगाएको प्रमुख जिल्ला अधिकारी भरत कुमार शर्माले जानकारी दिनुभयो ।
विद्यार्थी सिकाई सहजिकरण निर्देशिका २०७७ अनुसार वैकल्पिक सिकाई माध्यमबाट भने विद्यालयहरु संचालन गर्न दिइएको छ ।
