गुल्मी, २८ कार्तिक । गुल्मीको इस्मा गाउँपालिकामा कोभिड विशेष कृषि कार्यक्रमलाई यसबर्ष पनि विशेष प्राथमिकताका साथ संचालन गरिदै छ। गाउँपालिका भित्र रहेका कोभिड १९ बाट प्रभावित कृषकहरुलाई मध्ये नजर गर्दै तथाकोभिडबाट व्रभावित भई गाउँ फर्केका व्यक्तिहरुको स्वरोजगार गराई आर्थिक उत्पादनमा सहयोग पुर्याउने उदेश्यका साथ कार्यक्रम गर्न लागिएको हो ।
चालू आर्थिक बर्ष २०७७/७८ का लागि प्रदेश सरकारले यस गाउँपालिकालाई स्वीकृत गरेको कार्यक्रम अन्तर्गत कोभिड प्रभावित भई गाउँ फर्केका कृषकहरुलाई उत्पादन सामाग्रीहरुमा अनुदानसम्बन्धि कार्यक्रम अन्तर्गत तरकारी खेती, फलफुल खेती, पशुपालन, च्याउ खेती, मौरीपालन, कुखुरापालन, बङ्गुर तथा बाख्रापालन कार्यक्रम तय भएको उपाध्यक्ष बिमला खत्रीले जानकारी दिनुभयो । जसमा तरकारी खेती २ रोपनी, मौरीका ५ गोला घार, च्याउ खेतिमा १०० गोला, कुखुरा ५० वटा चल्ला, बङ्गुर तथा बाख्रा ५ वटा हुनु पर्ने कार्यविधिमा समावेश छ ।
स्थानिय स्तरमा रहेको बेरोजगारी समस्या समाधान गर्न तथा कृषकहरुलाई सहुलियत प्रदान गर्न यस्तो कार्यक्रम गर्न लागेको गाउँपालिकाले जनाएको छ । यसमा कृषकले ७५ प्रतिशत अनुदान तथा रु २०,००० रकम अनुदान पाउने छन ।
आर्थिक बर्ष २०७६/७७ का लागि स्विकृत कोभिड विशेष कृषि कार्यक्रममा गुल्मीका विभिन्न स्थानिय तहमा जनप्रतिनिधिको रजाइँ भएको खुलासा भएपछि यस कार्यक्रममा चुनौती थपिएको छ । यद्यपि जनप्रतिनिधिहरुले सुधार्ने मौका यस आर्थिक बर्षमा पाएको हुदा कार्यक्रम निष्पक्ष हुनु आवश्यक छ ।
